Depýtat N. Sabılıanov «Temeki tútininsiz Májilis!» atty bastama kóterdi
ASTANA. Qarashanyń 17-si. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda depýtat Nurtaı Sabılıanov depýtattardy temekige qarsy birlesip kúres júrgizýge shaqyrdy,
dep habarlaıdy QazAqparat.
«Aǵymdaǵy jyly «Halyq densaýlyǵy týraly» zań qoldanysqa endi. Zańnyń tolyq júzege asýyn qoǵam, qalyń jurtshylyq qoldap otyr. Al qujattyń 159-babynda «bilim berý uıymdarynda, densaýlyq saqtaý uıymdaryndaǵy kireberisterde, memlekettik organdardyń ǵımarattarynda temeki shegýge tyıym salynady», dep jazylǵan bolatyn. Bundaı shara Parlament Májilisinde aldymen júzege asyrylsa ıgi. Soǵan oraı, «Temeki tútininsiz Májilis!» degen bastamany júzege asyrýdy uıymdastyryp, bárimiz osyǵan úles qossaq. Óıtkeni temekiniń halyq densaýlyǵyna, jastardyń bolashaǵyna zııandylyǵy belgili. Biz ózimiz qabyldaǵan zań boıynsha halyqqa úlgi kórsetýimiz kerek», dedi depýtat N. Sabılıanov.
Sonymen birge, depýtat jaqynda Taıland elinde bir top áriptesterimen jumys sapary boıynsha baryp qaıtqanyn, ol eldegi temekige qarsy kúres tájirıbeleriniń tıimdi júrgiziletinin alǵa tartty. Máselen, depýtattyń aıtýynsha, Taılandta temekige qarsy negizgi tórt qaǵıdat saqtalǵan. «Birinshiden, temeki kompanııalarynan demeýshilik alynbaıdy. Ekinshiden, Qazaqstanda aktsızdi kóterýge mınıstrlikten bastap bári qarsy boldy, Taılandta aktsız tıisti deńgeıge kóterilip otyr. Úshinshiden, jarnamaǵa tolyq tyıym salynǵan. Tórtinshiden, Taılandtaǵy temeki kompanııalary ózderiniń tabysynyń 2 paıyzyn densaýlyq saqtaý qoryna aýdaryp otyrady», dedi N. Sabılıanov.
Depýtattyń bul bastamasyn Májilis Tóraǵasy Oral Muhamedjanov ta qoldap, sharany oılastyrý qajettigin atap ótti.
