Depýtat N. Sabılıanov aýa raıynyń qolaısyzdyǵyna oraı týyndaǵan máselelerdi sheshý úshin Shyǵys Qazaqstan oblysyna qosymsha qarjy bólýdi suraıdy
qpannyń 17-si. QazAqparat /Qanat Mámetqazyuly/ - Aýa raıynyń qolaısyzdyǵyna oraı týyndaǵan máselelerdi sheshý úshin Shyǵys Qazaqstan oblysyna qosymsha qarjy bólý qajet.
Búgin QR Parlamenti Májilisiniń jalpy otyrysynda QR Úkimet basshysynyń atyna saýal joldaǵan depýtat Nurtaı Sabılıanov osylaı málim etti, dep habarlaıdy QazAqparat.
«Aǵymdaǵy aıda aýa raıynyń qolaısyzdyǵy, qardyń kóp mólsherde túsýi, qatty aıazdyń uzaq ýaqyt saqtalýy saldarynan Shyǵys Qazaqstan oblysy birshama shyǵynǵa ushyrap, onyń saldaryn joıý úshin qosymsha qarjy qajettiligi týyndap otyr. Atap aıtqanda, bundaı qarajat eldi mekenderde jylýmen, otyn-kómirmen qamtamasyz etýge, joldardy qardan tazalaýǵa, azamattardy qutqarý jumystaryna, mal-jandy saqtaý máselelerine arnalyp jumsaýdy qajet etedi. Bıyl oblysta aıazdy-borandy kúnderi negizgi qatynas joldaryn tazalaıtyn tehnıkalardyń jetkiliksizdigi aıqyn ańǵaryldy. Jol boıynda qalyp qoıǵan adamdardy qutqarý, kólikterdi súırep jetkizý sekildi sharalar da asa qıyndyqtar týdyryp otyr. Budan bólek qalalardaǵy, eldi mekenderdegi jylý-sý qubyrlary isten shyǵýda», dedi depýtat.
Onyń aıtýynsha, turǵyndarǵa tıisti jaǵdaıdy qalyptastyryp, mal basyn saqtap qalý úshin tótenshe jaǵdaılar jónindegi oblystyq departamenttiń materıaldyq bazasyn jaqsartý da qajet etiledi.
