Depýtat Musyrman: Burynǵy polıtseılerdi qylmystyq topqa kirýge ne ıtermeledi
ASTANA. QazAqparat - Qarttar men múgedekterdi qaraqshylardan qorǵaý sharalaryn kúsheıtý kerek. Búgin Parlament Májilisiniń jalpy otyrysynda Úkimet basshysy Baqytjan Saǵyntaevtyń atyna joldaǵan saýalynda depýtat Káribaı Musyrman osy máseleni kóterdi, dep habarlaıdy QazAqparat.
«Jaqynda Almaty qalasynda polıtsııa qyzmetkerleri jalǵyzbasty qart adamdardy óltirip, olardyń páterlerin satýmen aınalysqan uıymdasqan qylmystyq topty quraqtaǵandyǵy málim boldy. Qylmys áleminiń bir bedeldisi basqarǵan 20-dan astam qaraqshynyń ishinde burynǵy polıtseıler men notarıýstar bar bolyp shyqty. Qazirdiń ózinde tergeýshiler olardyń iz-túzsiz joǵalyp ketken 4 adamnyń páterlerin zańsyz ıemdenip, satyp jibergendigin anyqtaǵan. Qandy qol qaraqshylardyń osyndaı 45 qylmysqa qatysy bar bolýy múmkin», - dep toqtaldy depýtat.
Onyń sózine qaraǵanda, uıymdasqan qylmystyq top músheleri qaýqary shamaly qart kisilerdi ańdyp júrip, ustap alyp, turyp jatqan jekemenshik páterlerin ózderiniń attaryna muraǵa qaldyrý týraly jazbasha ósıetke uryp-soǵyp, qınap qol qoıdyrtqan. Sodan keıin óz ortalaryndaǵy notarıýstar arqyly zańdastyrǵan soń, olardy óltirip, múrdelerin jasyryp kelgen kórinedi.
«Buryn-sońdy qulaq estimegen sumdyq qylmys týraly habardy qazaqstandyqtar jaǵalaryn ustap qabyl alyp, áleýmettik jelilerde ózderiniń oryndy ashý-yzalaryn bildirýde. Mine, osyndaı masqara qylmysty aldaǵy ýaqytta boldyrmaý maqsatynda tıisti usynystardy engizemiz», - dedi K. Musyrman.
Bul turǵyda Eńbek jáne halyqty áleýmettik qorǵaý mınıstrligi Іshki ister mınıstrligimen birlese Almaty qalasyndaǵy joǵaryda aıtylǵan aıýandyq qylmystardyń oryn alý sebepterine taldaý jasap, sonyń negizinde jalǵyzbasty qarttar men múgedekterdiń qaýipsizdigin qamtamasyz etý usynysy jasaldy. Osy oraıda qarttardyń múlikterin basqa adamǵa muraǵa berý týraly ósıetke zorlyq-zombylyqpen qol qoıdyrý men qasaqana óltirý jolymen zańsyz ıemdenýge jol bermeý sharalary qarastyrylýy tıis.
«Qylmyskerlerdiń jalǵyzbasty qart adamdar men múgedekterdiń múlikteri týraly aqparatqa qol jetkizý múmkindigin shekteý sharalaryn eskerý qajet. Budan bólek, Іshki ister mınıstrligi burynǵy polıtsııa qyzmetkerin uıymdasqan qylmystyq topqa kirýge ne ıtermelegendigin anyqtaýǵa jáne ondaı sebepterdi boldyrmaýǵa baǵyttalǵan yqpaldy sharalardy qoldanýy, sondaı-aq polıtsııanyń jeke quram arasyndaǵy tárbıe jumystaryn kúısheıtýi tıis», - dep naqtylady depýtat.
Onyń paıymynsha, Ádilet mınıstrligi «Notarıat týraly» Zańǵa sáıkes, notarıýstardyń jasaǵan notarıattyq is-áreketteriniń zańdylyǵyn jáne is júrgizý erejelerin qatań saqtaýyn baqylaýdy kúsheıtken jón.
