Depýtat: Kaspııdegi ıtbalyqtardyń qyrylýyn eshkim túsindire almaı otyr

ASTANA. KAZINFORM — Májiliste ótip jatqan Úkimet saǵatynda depýtat Edil Jańbyrshın munaı kompanııalary shyǵaryndylardyń avtomatty monıtorıng júıesin ornatýǵa qulyqsyzdyǵyn synady.

«2023 jyldan bastap 1 kategorııadaǵy 9 iri munaı kompanııasy zııandaýshy kózderge avtomattandyrylǵan monıtorıng júıesin ornalastyrý qajet edi. Alaıda, búgingi tańda tek 5 kompanııa ondaı jabdyqty tolyq iske qosty. Ekeýinde qosý jumystary júrip jatyr, ekeýi áli iske qosqan joq. Atap aıtsaq «Petro Kazahstan Oıl Prodakts» JShS, «SNPS-Aqtóbemunaıgaz» AQ-nyń Janajol munaıgaz óńdeý kesheni», — dedi ol.

Depýtat Ekologııa jáne tabıǵı resýrstar mınıstrligi avtomattandyrylǵan monıtorıng júıesin ornatpaǵan kásiporyndarǵa pármendi sharalardy qabyldaý kerek dep eseptedi.

«Sońǵy kezde Kaspıı teńizinde bolyp jatqan ekologııalyq jaǵdaılar qoǵamda ár túrli suraqtar týǵyzyp otyr. Áserese ıt balyqtardyń neden ólip jatqanyn naqty eshkim aıta almaı otyr. Jalpy elimizdegi barlyq kásiporyndar ekologııalyq monıtorıngti ózderi júrgizip otyr. Sondyqtan olardyń málimetiniń shynaılyǵy kúmándi. «Kim aqsha tóleıdi, sol mýzykaǵa tapsyrys beredi jáne ony tańdatady», — degen áńgime bar ǵoı. Qazirgi jaǵdaı osyǵan uqsas», — dedi Edil Jańbyrshın.

Depýtattyń sózinshe, Ekologııa mınıstrliginde sý aıdyndaryn zertteıtin arnaıy jabdyqtalǵan keme de joq.

«Kaspıı teńizindegi ken oryndardyń aınalasyna qorshaǵan ortanyń jaǵdaıyn onlaın rejımde quzyrly organǵa berip otyratyn avtomattandyrylǵan statsıonarlyq stantsııalardy ornatatyn ýaqyt keldi. Mundaı statsıonarlyq qondyrǵylar jerde de ornatylýy kerek. Sonda eshqandaı daý týmaıdy. Kim búldirdi, aıyppul tóleıdi», — dedi Májilis depýtaty.

Eske salsaq, Kaspıı jaǵasynda qyrylǵan ıtbalyqtar sany 2 myńǵa jetti. Osyǵan oraı táýelsiz ekolog ıtbalyqtardyń qyrylýyna baılanysty qylmystyq is qozǵalýy kerek ekenin aıtty.