Depýtat munaı óńdeıtin shaǵyn zaýyttardyń jumysyna tyıym salý qajet dep sanaıdy
ASTANA. 10 qazan. QazAqparat - Elimizdegi munaı óńdeıtin shaǵyn zaýyttardyń jumysyna tyıym salý qajet. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Ońalsyn Jumabekov osylaı málim etti.
Depýtattyń aıtýynsha, Qazaqstannyń ishki naryǵynda janar-jaǵarmaı tapshylyǵy 90-shy jyldardyń basynda-aq baıqaldy. Sondyqtan Mańǵystaý oblysyndaǵy Aqtaý qalasynyń janynan 4-shi munaı óńdeý zaýytyn salý jóninde daıyndyq jumystary júrgizilgen. Bul rette depýtat sol kezdegi belgili qıynshylyqtarǵa baılanysty munaı óńdeý zaýytynyń qurylysy bastalmaǵanyn, munaı óńdeý salasy boıynsha damyǵan elderden keıin qalý odan ári jalǵasa bergenin jáne ol sheshilmeıtin problemaǵa aınalǵanyn alǵa tartady.
«Eýroodaq 2000 jyldardyń ózinde EÝRO-3 avtokóliktegi ekologııa baǵdarlamasyna baılanysty benzınge jáne dızel otynyna qatań erekshelik talaptaryn engizdi, al, 2005 jyly EÝRO-4 baǵdarlamasy boıynsha qatań normalarǵa kóshse, 2009 jyly EÝRO-5 baǵdarlamasy boıynsha tipti odan da qatań talaptarǵa kóshti. Al bizdiń elimizde tek 2016 jyly ǵana Qazaqstandaǵy úsh munaı óńdeý zaýyttaryn rekonstrýktsııalaý jáne jańǵyrtý jónindegi jumystar nátıjesinde EÝRO-3, EÝRO-4 jáne EÝRO-5 standarttaryna sáıkes keletin ónim alý kútilýde. Biraq qolda bar barlyq jeńil avtokólikter parki qazirdiń ózinde joǵary oktandy benzındi paıdalanýdy qajet etýde, óıtpese olar merziminen buryn isten shyǵatyn bolady. Janar-jaǵarmaı tapshylyǵy munaı óńdeıtin shaǵyn zaýyttardyń paıda bolýyna ákep soqty. Mundaı shaǵyn zaýyttardyń jumysyna tyıym salý kerek dep esepteımin. Birinshiden, shaǵyn zaýyt degenińiz beıbereketsizdik; ekinshiden, ol munaıdyń urlanýyna sebep bolady; úshinshiden, ol sapasy nashar benzın shyǵarýǵa jáne ony teris paıdalanýǵa jaǵdaı jasaıdy», - dedi O. Jumabekov.
