Depýtat múmkindigi shekteýli balalardy qazirgi zamanǵy arbalarmen qamtýdy usyndy
ASTANA. QazAqparat - Parlament Májilisiniń jalpy otyrysynda depýtat Magerram Magerramov múgedek balalardy qajetti kreslo-arbamen qamtamasyz etý máselesin kóterdi, dep habarlaıdy QazAqparat.
«Qoldanystaǵy arnaıy arbalardy berý júıesi erekshe muqtajdyqtary bar balalarǵa qajet talaptarǵa jaýap bermeıdi. Beriletin aýyr, qolaısyz múgedekter arbasy múgedek balalardyń ahýalyn nasharlatady, omyrtqalarynyń qısaıýyna, dene terileriniń oıylýyna jáne depresııalyq jaǵdaıǵa ákelip soqtyrady. Mundaı arbalar balalardy alyp júrýshi adamdarǵa da qıyndyqtar týǵyzady. Óıtkeni ol arbalarmen qalada qydyrý, qoǵamdyq kólikpen júrý, pandýstarǵa kóterilý jáne ǵımarat ishinde qozǵalý qıyn», - dep toqtaldy depýtat Eńbek jáne halyqty áleýmettik qorǵaý mınıstrine joldaǵan saýalynda.
Onyń sózine qaraǵanda, kóp jaǵdaıda adamdar osy arbalardy alýǵa májbúr, biraq ony paıdalanbaıdy dese de bolady.
«Sonda, memleket adamdarǵa paıdasy joq zatqa ájeptáýir qarjy qarajatyn bosqa shyǵyndap jatyr. Osyǵan oraı erekshe muqtajdyqtary bar balalardy múgedekter arbasymen qamtamasyz etýdiń qoldanystaǵy júıesin qaıta qaraýdy, sondaı-aq memlekettiń kómegine muqtaj balalarǵa arnalǵan memleket qarjysyn tıimdi jáne maqsatty paıdaǵa asyrylýyn usynamyz. Qolaısyz arbalardyń ornyna bólme ishinde, kóshede jáne poıyzdarda qoldanýǵa yńǵaıly qazirgi zamanǵy fýnktsıonaldy paıdaly arba túrlerin satyp alý qajet», - dep túıdi sózin Magerram Magerramov.
Foto: www.mega-optim.ru
