Depýtat múgedektigi bar jandardyń problemasyn sheshý úshin birqatar usynys aıtty
Májilis depýtaty Tańsaýle Serikov múgedektigi bar jandardyń problemasyn kóterip, Premer-Mınıstrdiń orynbasary Tamara Dúısenovanyń atyna saýal joldady, dep habarlaıdy Kazinform.
«Qazir bir óńirde ǵana emes, elimiz boıynsha kásibı túrde protez jasaıtyn maman joq. Eńbek jáne halyqty áleýmettik qorǵaý mınıstrliginiń aqparatyna sáıkes, 2023 jylǵy naýryz aıyndaǵy jaǵdaı boıynsha elimizde 715 myńnan asa múgedektigi bar adam bar. 5 óńirde osy jandardyń teń jartysy turady eken. Onyń arasynda Túrkistan oblysynda – 97,1 myń, Qaraǵandy oblysynda – 66,3 myń, Almaty oblysynda – 64,5 myń, Shyǵys Qazaqstan oblysynda – 50,2 myń jáne Almaty qalasynda 57,1 myń adam tirkelgen. Aýyldarda 305,5 myń nemese 42, 7 paıyzy turyp jatyr. Sonymen qatar, tirek-qımyl júıesi buzylǵan 200 myńnan asa adam bar», - dedi T.Serikov.
Onyń aıtýynsha, memleket úsh toptaǵy múgedekterge tegin protez jasaýǵa kepil bolǵanymen, is júzinde bul jumystar óte baıaý iske asyp jatyr. Elimizde protez jasaıtyn úsh-tórt adam ǵana bar, olardyń ózi múgedektigi bar jandar. Kolledjder men joǵary medıtsınalyq oqý oryndarynda mundaı mamandyq boıynsha oqytpaıdy.
«Protez – adamnyń dene múshesiniń jasandy túri, sondyqtan bul máselege tııanaqty túrde qaraý kerek. Protezdi jylyna keminde eki ret tekserýden ótizip otyrý qajet. Al balalar protezin ár eki aı saıyn jóndeýden ótkizýi kerek, sebebi balanyń súıegi tez ósedi. Osy oraıda myqty protezıst-ortoped maman kerek. «Protezdi-ortopedııalyq jáne ońaltý tehnıkasy» bólimderin Astana, Almaty, Qaraǵandy qalalarynda nemese taǵy ózge óńirlerdegi medıtsınalyq oqý oryndarynda oqytýǵa múmkindik berý qajet», - dedi depýtat.
Munymen qosa T.Serikov múgedek jandarǵa arnalǵan arbanyń sapasy nashar ekenin aıtty. Bul rette, osy arbalarda elimizdegi qurastyrý usynysy jasaldy.
«Endi osy arbalardyń baǵasyn aıtsam, avtokólik baǵasymen teń bop qaldy. Áleýmettik partal arqyly syrtta júrýge arnalǵan arbanyń qoldaný merzimi 5 jyl, úıde júrýge arnalǵandar – 7 jyl, mobıldi aktıvti túrdegi kolıaska 5 jylǵa berilgen. Biraq olar kóp bolsa bir eki-jylǵa ǵana shydaıdy, ıaǵnı sapasy joq. Al sapaly 10 jyl júrip beretin arbalar 1,5-2 mln teńge shamasynda», - dedi ol.
Depýtat joǵaryda aıtylǵan máselelerge baılanysty myna usynystardy jarııalady:
- Qazaqstanda protez jasaıtyn protezıst mamandaryn daıyndaýdy engizý kerek.
- Elimizde múgedek jandar úshin kolıaska jasaý óndirisin iske qosý qajet. Qala ortalyqtarynda arba jóndeıtin tıisti ortalyqtar kerek.
- Múgedektikti rastaý jónindegi № 260-shy buıryq qaıta qaralýy tıis.
