Depýtat múgedektigi bar azamattarǵa zeınetaqy men járdemaqyny qosyp tóleýdi usyndy

ASTANA. KAZINFORM – Májilis depýtaty Tańsáýle Serikov vıtse-premer Tamara Dúısenovaǵa joldaǵan depýtattyq saýalynda múgedektigi bar azamattarǵa zeınetaqy men járdemaqyny qosa tóleýdi usyndy.

«Qazir múgedektigi bar jandar zeınet jasyna kelgende ne zeınetaqyny, ne járdemaqyny tańdaýǵa májbúr. Eńbek ótili 1998 jyldan bastalatyn múgedek azamattarǵa zeınetke shyqqanda tek zeınetaqy qorynda jınalǵan qarajat qana bólinip beriledi. Bul - qorǵa qarajat aýdarmaıtyn múgedek jan eshteńesiz qalady degen sóz. Aıyna 95 myń teńge járdemaqy alatyn múgedek nesin aýdarady?» - deıdi depýtat.

Onyń málimeti boıynsha. qazir birinshi toptaǵy múgedektigi bar azamattar 95 496 teńge, ekinshi top 79 435 teńge, úshinshi toptaǵy múgedekter 69 886 teńge járdemaqy alady.

«Sol sebepti, járdemaqy men zeınetaqyny qosa berý kerek. Ondaı bolmaǵan jaǵdaıda eńbekke qabiletti múgedekterdi jumyspen qamtý qajet. Eger bul máseleniń oń sheshimi tabylmasa, bir mıllıonǵa jýyq azamat avtomatty túrde kedeıshilik shegine enetin bolady. Osy aıtylǵandardy eskere kele múgedektigi bar tulǵalar zeınet jasyna jetkende de járdemaqysyn toqtatpaı qosa berýdiń júıesin qalyptastyrý kerek. Ol úshin Áleýmettik kodekske ózgertýler men tolyqtyrýlar engizý qajet. Múgedektigi bar adamdardyń quqyqtaryn qamtamasyz etý jáne turmys sapasyn jaqsartý jónindegi ulttyq jospary 2025 jyldan keıin de jalǵasyn tabý kerek», - deıdi Tańsáýle Serikov.

Osyǵan deıin 2024 jyly múgedektigi bar adamdar portal arqyly 777 myńnan astam qyzmet túrine júgingeni týraly jazdyq.