Depýtat mınıstrliktiń bızneske qysym kórsetetin buıryqtaryn joıýdy talap etti
ASTANA. KAZINFORM — Parlament Májilisiniń depýtaty Bolatbek Nájmetdınuly Ulttyq ekonomıka mınıstrligi qabyldaǵan keıbir normatıvtik-quqyqtyq aktilerdiń bızneske qysym kórsetip otyrǵanyn málimdep, vıtse-premer – Ulttyq ekonomıka mınıstri Serik Jumanǵarınniń atyna depýtattyq saýal joldady.
Depýtattyń aıtýynsha, Konstıtýtsııalyq zańnyń 22 jáne 24-baptaryna sáıkes, depýtattar zańdardyń oryndalýyna parlamenttik baqylaýdy júzege asyrýǵa mindetti. Al Kásipkerlik kodekstiń 65-3-babynda árbir jańa mindetti talap tek eki eski normany alyp tastaǵannan keıin ǵana engizilýi tıis dep kórsetilgen.
«Alaıda №353 buıryqtyń jańa redaktsııasy (oǵan engizilgen №239 jáne №251 buıryqtar arqyly) osy qaǵıdattardy buzdy. Qatań shekteýler engizilgenimen, burynǵy normalar joıylǵan joq. Máselen, ruqsattar belgili bir kólikke qatań bekitildi, al tasymaldaýshylar jylyna altydan artyq blankti qaıtara almaıdy. Bul bızneske orny tolmas zııan keltirip otyr», – dedi depýtat óz saýalynda.
Onyń sózinshe, atalǵan ózgerister qysqa merzimde kelisilip, retteýshilik yqpalǵa taldaý (ARV) súzgisinen ótpeýi tıis edi. «Regýlıatorlyq gılotına» qaǵıdaty boıynsha bul normalar qabyldanbaýy qajet bolatyn.
«Prezıdent Qasym-Jomart Toqaev atap ótkendeı, júzdegen zańdar artyq túzetýlermen shamadan tys júktelgen. Olar bir-birine qaıshy kelip, ınvestorlardy da, bıznesti de tejeıdi. Bul jaǵdaıda Ulttyq ekonomıka mınıstrliginiń keıbir buıryqtary dál osyndaı jaǵdaıǵa ákeldi. Bızneske qorǵan bolýdyń ornyna, ákimshilik qysymdy kúsheıtip, regýlıatorlyq reformanyń bedelin túsirdi», – dedi Májilis depýtaty.
Osyǵan baılanysty Bolatbek Nájmetdınuly mynadaı talaptar qoıdy:
– Retteýshilik yqpalǵa taldaý departamentiniń jáne onyń laýazymdy tulǵalarynyń is-áreketterine baǵa berý;
– №239 jáne №251 buıryqtarǵa qatysty retteýshilik yqpalǵa taldaý qorytyndysyn qaıta qaraý;
– atalǵan buıryqtardyń kúshin joıý;
– Retteýshilik yqpalǵa taldaý rásimine qatysty tásildi qaıta qarastyryp, salalyq organdar bastamalarynyń formaldy túrde kelisilmeýin qamtamasyz etý.
Aıta keteıik, Prezıdent kásipkerlikke kedergi keltiretin máselelerdi joıýdy tapsyrdy.