Depýtat mınıstrge jantúrshigerlik jol apattary týraly saýal joldady
ASTANA. QazAqparat - Parlament Májilisiniń depýtaty Pavel Kazantsev jantúrshigerlik jol apattaryna qatysty QR Іshki ister mınıstri Qalmuhanbet Qasymovtyń atyna depýtattyq saýal joldady, dep habarlaıdy QazAqparat.
«2018 jyly jol-kólik oqıǵasynan 2 myńnan astam adam kóz jumdy, 20 445 adam jaraqat aldy. Beıbit zamanda adamdar soǵys kezindegi sekildi qaza bolýda. Zardap shekkenderdiń jalpy sanynan 70 paıyzǵa jýyǵy eńbekke jaramdy jasta. Jol-kólik oqıǵasy saldarynan zardap shekkendirdiń kóbisi múgedek bolyp qalady», - dedi depýtat Májilistiń jalpy otyrysynda.
Onyń sózine qaraǵanda, elimiz 28 jyl ishinde 82 myńǵa tarta adamdy joǵaltty, al zardap shekkender jarty mıllıonǵa jetti.
«Eger de bizde qaza bolǵandar sany jyl saıyn tómendese, al zardap shekkender kórsetkishi 2018 jyldyń 11 aıynda 1991 jyldaǵy deńgeıden asyp tústi. Bul rette osy jyldary avtokólik sany artqany túsinikti. Degenmen de jol-kólik oqıǵalarynyń kóbisi kóliktegi aqaý nemese jol ınfraqurylymy jaǵdaıyna baılanysty emes. Joldaǵy apattyń basym bóligi jol qozǵalysyndaǵy adamdardyń, júrgizýshilerdiń kinásinen oryn alýda. Bul óz kezeginde barlyq JKO-nyń 95 paıyzyn qamtyp otyr», - dedi depýtat.
Osy oraıda P. Kazantsev qalyptasqan jaǵdaıdy keshendi túrde sheshý kerektigin tilge tıek etti.
«Kólik júrgizýdi úıretetin uıymdarǵa qatysty, sondaı-aq júrgizýshi kýáligin alý boıynsha emtıhandar men rásimderge talaptardy kúsheıtý kerek. Jolaýshylardy tasymaldaýdy uıymdastyrý turǵysynda qadamdardy qaıta qaraý qajet», - dedi ol.
Esterińizge sala keteıik, 2018 jylǵy 29 jeltoqsanda Almatydaǵy Seıfýllın men Abaı kósheleriniń qıylysynda Mitsubishi Galant pen «Mercedes Benz G-55» kólikteri soqtyǵysqan. Jol apatynan Mitsubishi Galant kóliginde bolǵan úsh adam, belgili aktrısa Sholpan Elgezekova men onyń qurbysy jáne Mitsubishi Galant júrgizýshisi kóz jumdy.
Al kólikte bolǵan M.Áýezov atyndaǵy qazaq memlekettik akademııalyq drama teatrynyń aktrısasy jáne telejúrgizýshi Aızada Satybaldıeva alty qabyrǵasy synyp, asa aýyr halde Almaty qalalyq shuǵyl kómek kórsetý aýrýhanasynyń jansaqtaý bólimine jetkizilgen edi.
