Depýtat mektepterdegi zańsyz ýaǵyz ben kópáıeldilik nasıhatyna tosqaýyl qoıýdy usyndy

ASTANA. KAZINFORM – «Referendým–2026» aqparattyq alańynda Májilis depýtaty, Konstıtýtsııalyq komıssııa múshesi Murat Ábenov mańyzdy málimdeme jasady. Ol zaıyrlylyq ustanymdaryn qatańdatý, bilim berý salasyn dinı yqpaldan qorǵaý jáne otbasy ınstıtýtynyń konstıtýtsııalyq negizderin saqtaý máselesin kóterdi. 

Murat Ábenovtiń aıtýynsha, qazirgi tańda dinı aǵymdardyń mektepter men kolledjderge enip, balalardyń damýyna kedergi keltirýi jıilep ketken. Depýtat memlekettik qarjymen jumys isteıtin oqý oryndarynda zańsyz ýaǵyzdardyń aıtylýyna túbegeıli qarsy.

– Din ózine qatysy joq jerge aralasyp jatyr. «Dombyra tartýǵa bolmaıdy, ónermen aınalysýǵa bolmaıdy» degen sııaqty tyıymdarmen balalardyń damýyna qarsylyq bildirip jatady. Sabaq ýaqytynda balalardy meshitke aparyp, sharalar ótkizý – bul bala quqyǵyn tikeleı buzý, - dedi Murat Ábenov.

Depýtat dinı sala men bilim berý salasynyń arajigin naqty ajyratyp, zańmen shegendeý qajettigin basa aıtty.

Sonymen qatar qoǵamda beleń alǵan «ekinshi áıel alý» nasıhaty da depýtattyń nazarynan tys qalmady. Murat Ábenov bul úrdistiń Konstıtýtsııa qaǵıdattaryna qaıshy keletinin jáne áıelder men balalardyń quqyǵyn aıaqqa taptaıtynyn jetkizdi. 

Konstıtýtsııanyń jańa jobasynda otbasy týraly norma «neke – tek bir er adam men bir áıel adamnyń óz erkimen bas qosýy» dep naqtylanbaq. 

– Birinshi áıel, ekinshi áıel dep nasıhattaý – saıasatqa qarsy. Bul jerde balalar men áıelderdiń quqyǵy buzylady. Sondyqtan biz Konstıtýtsııaǵa neke tek bir er adam men bir áıel adamnyń arasynda bolady dep jazdyq, - dep túsindirdi komıssııa múshesi.

Aıta keteıik, Konstıtýtsııalyq sot tóraǵasynyń orynbasary Baqyt Nurmuhanov óz kezeginde neke men otbasy qundylyqtaryn kúsheıtýdi qoldaǵan edi.