Depýtat mektepterde muǵalimderden qarajat jınaý júıesin joıýdy talap etti
ASTANA. KAZINFORM – Búgin Májilistiń jalpy otyrysynda depýtat Naýryz Saılaýbaı mektepterdegi sybaılas jemqorlyq máselesin kóterdi.
«Tarıhy tereń bilim ordalaryndaǵy jomqorlyq jáne búldirshinderdiń tamaǵyna talasqandar qazirgi tańda shákirtke tulǵa bola almaı tur. Jeń ushynan jalǵasqan jemqorlyq áreketi mektepke qarapaıym eden jýýshy, kúzetshi jáne aýla sypyrýshy bolyp jumysqa turaıyn deseń de jaǵańnan alyp, tyǵyryqqa tireıdi. Ustaz bolyp, shákirt tárbıleımin deseńiz onyń stavkasy bólek áńgime. Joǵary oqý ornyn bitirip, jumys istegisi keletin jas mamannyń saǵy synyp, osynyń kesirinen basqa salaǵa ketýge májbúr. Máselen, bıyl Qyzylorda oblysy Jańaqorǵan aýdandyq soty «Jańaqorǵan aýdanynyń bilim bólimi» MM basshysy, bas býhgalteri jáne 24 mekteptiń býhgalterlerine jalpy somasy 1 mlrd teńgeden asa iri mólsherde bıýdjet qarajatyn jymqyrǵany úshin úkim kesti. Bul bir aýdandaǵy áshkere bolǵan áreketterdiń biri ǵana», - dedi N. Saılaýbaı Oqý-aǵartý mınıstri Ǵanı Beısembaevtyń atyna joldaǵan saýalynda.
Sonymen qatar depýtat bilim oshaqtaryndaǵy búldirshinderge beriletin ystyq tamaqtyń jaǵdaıy jıi synǵa ushyraıtynyn eske saldy.
«2023 jyly osy jemqorlyqtyń kesirinen 192 qylmystyq is qozǵalyp, 13 mıllıard teńge jymqyrylǵan. Іri jymqyrýlar Jetisý, Qyzylorda, Túrkistan oblystary men Almaty qalasynda oryn aldy. Bul jerdegi jemqorlyq shemasy 1 jyldyq emes, ondaǵan jyldar boı jumys istep kele jatqan úlken bir júıe», - dedi ol.
Bul turǵyda Naýryz Saılaýbaı birneshe usynysyn jarııalady. Birinshiden, esep-qısap júıleri arasyndaǵy baılanysty túzetý kerek. Bul jerde bilim bólimi basshysy, dırektor men býhgalterdiń arasyndaǵy syıbaılastyǵyn joıýǵa nazar aýdarý mańyzdy.
«Ekinshiden, mektepterde muǵalimderden qarajat jınaý júıesin joıý kerek. «Belgisiz fondtarǵa» kerekti qural-jabdyqtar alamyz degen bastamamen aqsha jınalady. Negizinde, bilim ordasyna kerek keńse taýarlaryna Úkimettken tikeleı qarajat bólinbeı me? Budan bólek, oblys, aýdan, qala arasyndaǵy bıýdjettik jospar men bólinistiń ashyqtyǵy jáne osy júıeni tsıfrlandyrý arqyly aqparattyq ashyq bolýy qamtamasyz etilýi tıis», - dedi depýtat.
Budan buryn habarlanǵandaı, bıyl sáýir aıynda Jańaqorǵanda bilim bólimi basshysy men 24 mekteptiń býhgalteri sottaldy.
