Depýtat mektepte keı pánderdi aǵylshyn tilinde berý júıesine kúmán keltirdi
ASTANA. QazAqparat - Májilis depýtaty mekteptegi keıbir pánderdi aǵylshyn tilinde berý júıesiniń tıimdiligine kúmán keltirdi, dep habarlaıdy «QazAqparat» HAA tilshisi.
Májilis depýtaty Irına Smırnova QR Premer-Mınıstri Baqytjan Saǵyntaevtyń atyna depýtattyq saýal joldady. Ol óziniń saýalynda mekteptegi keıbir pánderdi aǵylshyn tilinde berý júıesi týraly máseleni kótergen.
«Astanadaǵy lıtseılerdiń birinde aǵylshyn tilinde sabaq berýdi tekserý úshin bıologııa páni boıynsha ashyq sabaq ótkizildi. Muǵalim barlyq aıtar tálimin qaǵazǵa qarap turyp, shala aǵylshyn tilinde oqyp shyqty. Sabaqqa qatysqan oń áseri úshin 30 balanyń beseýin tańdap alyp, sóıletip qoıǵan», - deıdi Irına Smırnova.
Depýtat óz sózinde fızıka, hımııa, bıologııa pánderi muǵalimderin aǵylshyn tiline úıretý úshin sońǵy eki jyl boıy memleket esebinen qarajat bólinip jatqanyn atap ótti. Alaıda úsh aı muǵalimniń aǵylshyn tilin meńgerýine jetpeıtindikten, keıbir ustazdardy kýrstardan qaıta ótkizý qajettiligi týyndap otyr.
Smırnovanyń aıtýynsha, aǵylshyn tilinde oılamaq túgili, túsindirip bere almaıtyn muǵalimniń sabaqty aǵylshyn tilinde júrgizýi tıimsiz. Fızıka, hımııa, bıologııa pánderin keıbir oqýshylar tipti óz tilinde meńgere almaı jatady.
Sonymen birge, Irına Smırnova 10 synyp oqýshylarynyń 10-15 paıyzy ǵana aǵylshyn tilin meńgerip, osy tilde basqa pánderdi oqı alatynyn aıtady. Depýtattyń paıymdaýynsha, qazirgi tańda bilim berý júıesi engizilip jatqan Nazarbaev zııatkerlik mektebinde atalǵan pánderdi bir ýaqytta eki muǵalim beredi. Naqtyraq aıtqanda, eki muǵalimniń biri ana tilinde, ekinshisi aǵylshyn tilinde oqytady.
Joǵaryda atalǵan jaılardy eskere otyryp, «Halyq kommýnısteri» fraktsııasynyń depýtattary bul máseleni pragmatıkalyq turǵyda qarastyrýdy usyndy. Naqtyraq aıtqanda, olar tarapynan mektep oqýshylary 9 synypqa deıin úsh tildi erkin meńgeretindeı til bilimi sabaqtaryn sapaly etý usynylyp otyr. «Halyq kommýnısteri» fraktsııasy depýtattarynyń paıymdaýynsha, bul qadam oqýshy úshin bilimdi kez kelgen tilde alý múmkindigin ashady. Sondaı-aq, olar mektep bitirý týraly kýálikte jáne attestatta baǵa emes, tildi bilý deńgeıin belgileýdi, JOO-lardaǵy fılolog muǵalimderdiń daıarlyǵyn jaqsartyp, fızıka, hımııa, bıologııa pánderin mektepte aǵylshyn tilinde tıimdi túrde berý júıesin engizýdi jón dep esepteıdi.
