Depýtat mektep mańyndaǵy dúkenderge qoǵamdyq baqylaý uıymdastyrýdy usyndy
«Elimiz pandemııamen arpalysyp júrgende, jasóspirimder arasynda bir rettik veıp «epıdemııasy» beleń alyp barady. Búginde oń-solyn tanymaǵan jas urpaqtyń sanasyn kók tútinmen ýlaǵan bir rettik elektrondy shylymnyń dáýreni júrip tur. Jastar arasynda veıp tańsyq dúnıe emes, biraq sońǵy ýaqytta bir rettik túri paıda bolǵaly jaǵdaı kúrt ózgerdi. Sórelerden shylym ketip, ornyn arnaıy suıyqtyqty toltyrýdy, qaıta qýattandyrýdy qajet etpeıtin quramynda nıkotıni temekiden 2,5 ese joǵary, bir rettik veıp almastyrdy. Nátıjesinde, osy ýaqytqa deıin memleket tarapynan nıkotındi shekteýge baǵyttalǵan aýqymdy jumysty joqqa shyǵaryp otyr», - dep toqtaldy M. Ahmetov QR Premer-Mınıstriniń orynbasary Eraly Toǵjanovtyń atyna joldaǵan saýalynda.
Osy oraıda depýtat atalǵan temekini bilim oshaqtarynyń manyńda ashyq sórelerde satýǵa ruqsat etilmeıtinin, ıaǵnı olar kez kelgen saýda núktelerinde jabyq perdelerdiń artynda, sórelerdiń astynda bolýy kerek ekenin eske saldy. Kez kelgen dúken sóresinde tolyp turǵan túrli-tústi muqabaly, san túrli dámi bar bir rettik veıpten kóz súrinedi jáne olar kámeletke tolmaǵan jetkinshikterge emin-erkin satylýda.
«Dúken bylaı tursyn, áleýmettik jelini ashsańyz, nıkotındi taýardy táýlik boıy úıińizge tegin jetkizip beretin pablıkterde, anonımdi telegram kanaldarda júzdegen jarnama bar. Tapsyrys berýshiniń jasyn surap, bas qatyryp jatqan eshkim joq. Osynyń saldarynan oqý jylynyń basynan oqýshylar arasynda tútini býdaqtaǵan zııandy shylymǵa suranys eselep artqan. Tipti, keıbir mektepterde joǵary synyp oqýshylary bastaýysh synyptarǵa bir rettik temekiniń qunyna aqsha qosyp satyp, áýestendirip júr. Elimizdiń ulttyq qoǵamdyq densaýlyq saqtaý ortalyǵynyń sońǵy 2019 jylǵy zertteýleriniń málimetine súıensek, 11 jastan 15 jasqa deıingi elektrondy temeki shegetin jasóspirimderdiń sany 3 esege, al qyzdar arasynda 2 esege ósken. Kósh basynda 3,9 paıyz kórsetkishpen almatylyq jasóspirimder tur. Atalǵan zertteý sońǵy eki jyl júrgizilmegendikten, qazirgi jaǵdaı múlde belgisiz», - dedi M. Ahmetov.
Onyń aıtýynsha, álemniń 35 eli tyıym salǵan, 65 memleket arnaıy shara qabyldaǵan eletrondy jáne bir rettik temekiler bizge Qytaıdan eshqandaı sertıfıkatsyz, shekteýsiz mólsherde aǵylyp kelip jatyr. Bir qarys quraldyń quramy áli kúnge deıin anyqtalmaǵan, naqty zertteý joq, nıkotın dozasyn da eshkim baqylamaıdy.
Osy oraıda naqty usynystar jasaldy.
«Birinshiden, otandyq naryqqa turaqty túrde keden arqyly zańǵa qarsy, birde-bir tehnıkalyq reglametke saı kelmeıtin bir rettik veıpter áli kúnge deıin tonnalap qalaı kirgizilýde? Bul protseske tikeleı jaýapty quzyretti organdar qaıda qarap otyr? Oryn alǵan jaǵdaıdyń anyq-qanyǵyn zerdelep, kinálilerdi jaýapqa tartýdy suraımyz. Ekinshiden, shuǵyl túrde bir rettik veıpterdi zerttep, quramyn buqaraǵa jarııa etip, máseleniń mán-jaıy anyqtalǵansha, quzyretti mekemelerden bir rettik shylymdy satylymnan alyp tastaýdy, konfeskileýdi suraımyz. Mektep mańyndaǵy dúkenderge qoǵamdyq baqylaý uıymdastyryp, zańdy belshesinen basqandarǵa qatań shara qoldaný kerek», - dedi depýtat.
