Depýtat: Mektep basshylarynyń quqyǵyn arnaıy zań babymen qorǵaýdy usyndy

ASTANA. KAZINFORM – Májilis depýtaty Erbolat Saýryqov Premer-mınıstrdiń orynbasary Ermek Kósherbaevtyń atyna saýal joldap, mektepten tys jerde zań buzǵan oqýshylar úshin mektep basshylaryn jazalaýǵa zańmen tyıym salýdy usyndy.

- Sońǵy ýaqytta elimizdiń túrli óńirlerinde mektep oqýshylarynyń mektep aýmaǵynan, sabaqtan tys ýaqytta, demalys, kanıkýl kezinde jasaǵan quqyqbuzýshylyqtary úshin mektep dırektorlary men oqý bóliminiń meńgerýshilerin tártiptik jazaǵa tartý nemese jumystan shyǵarý jaǵdaılary kóbeıip barady. Biz bul úrdisti óte alańdatarlyq dep sanaımyz. Óıtkeni, mektep basshylyǵy tek oqý-tárbıe protsesin uıymdastyrýǵa jaýapty ekenin bárimiz jaqsy bilemiz. Al sabaqtan tys ýaqytta nemese demalys kezeńinde bolǵan oqıǵalar úshin olardy jazalaý – ádiletsizdik, - dep bastady ol saýalyn.

Aıtýynsha, bul másele ásirese aýyldarda ýshyǵyp tur.

- Búginde aýyl mektepterinde dırektor jáne oqý bóliminiń meńgerýshisi laýazymdaryna úmitkerler tabý qıyn. «Erteń men de jumystan shyǵyp qalam ba? Negizsiz jaýapqa tartylam ba?» degen qorqynysh muǵalimder men basshylardyń arasynda kúndelikti qalypty jaǵdaıǵa aınaldy, - deıdi depýtat.

Erbolat Saýryqov oqýshylar mektepten tys ýaqytta jáne kanıkýl kezinde zań buzsa, ol úshin mektep basshylaryn jaýapqa tartýǵa bolmaıtynyn resmı túrde málimdeý kerek dep esepteıdi.

- «Bilim týraly» jáne «Quqyq buzýshylyqtardyń aldyn alý týraly» Zańdarǵa naqty túzetýler engizip, osy máseleni zań júzinde retteý qajet dep sanaımyz. «Quqyq buzýshylyqtardyń aldyn alý týraly» Zańǵa arnaıy norma engizip, kámeletke tolmaǵandardyń quqyq buzýshylyqtarynyń aldyn alý tetikterin egjeı-tegjeıli anyqtap kórsetý qajet. Bul normalarda ata-analardyń jaýapkershiligi birinshi kezekte ekenin zań deńgeıinde naqtylap kórsetý kerek, - dedi Májilis depýtaty.

Eske salsaq, bıyl qysta Semeıde 6-synyp oqýshysy soqqyǵa jyǵylǵan mektep dırektory jumystan shyǵarylǵan bolatyn.