Depýtat medsaqtandyrý qoryndaǵy qarajatty tekserýdi usyndy
«Depýtattyq saýal joldaýymyzǵa bıyl medıtsınalyq uıymdardy tolyq qarjylandyrý 2021 jylmen salystyrǵanda tolyq emes bolýy sebep boldy.
Osy týraly saýaldarymyzǵa Densaýlyq saqtaý mınıstrligi bekitken tarıfter medıtsınalyq qyzmet kórsetýge baılanysty barlyq shyǵyndardy tolyǵymen jabatyny týraly aıtylǵan jaýap keldi. Biraq ol jaýapta jańa tarıfterdiń kalkýlıatsııasy usynylmaǵan.
2022 jylǵa arnalǵan Densaýlyq saqtaý shyǵystarynyń kólemi 2021 jyly bekitilgenine qaramastan, medıtsınalyq qyzmetterdiń tarıfi 2022 jyldyń naýryz aıynda ǵana bekitildi. ıAǵnı, bıylǵy tarıfter byltyr bólingen bıýdjetke qarap otyryp, belgileı salǵan sııaqty», - dedi depýtat.
Májilis depýtaty bul ýájine mysal da keltirdi.
«Mysaly, IV sanattaǵy jedel járdem tarıfi bir turǵynǵa 39 teńgeden bastalady. Bul shyǵynyń 30%-yn ǵana jabady. Mundaı tarfıpen alsaq, jedel járdem qyzmetiniń aılyq bıýdjeti 1 mln 59 myń teńge degen sóz. Mundaı bıýdjetten árqaısynda 2 adam bar 6 brıgadanyń jalaqysyn qalaı tóleýge bolady? Onyń syrtynda túngi kezekshilikterdiń, dıspetcherlerdiń aılyǵy jáne dári-dármek, benzın, kommýnaldyq qyzmet, kólikti kútip-ustaý shyǵyndary jáne bar», -dep túsindirdi Gúldana Nurymova.
Aıtýynsha, osyndaı saıaattyń saldarynan bólinip jatqan qarajattyń 80%-y tek jalaqyǵa jumsalady.
«Árıne, medıtsınalyq uıymdardyń damýyna, zamanaýı jabdyqtar satyp alýǵa nemese jóndeýge qarajaty joq.
Medıtsına qyzmetkerleri eki ottyń ortasynda qalyp otyr. Bir jaǵada ózderine tıesili sapaly medıtsınalyq kómek talap etetin saqtandyrylǵan azamattar, al ekinshi jaǵada qarjylandyrý josparynan aspaýdy talap etetin jáne aıyppul salatyn áleýmettik medıtsınalyq saqtandyrý qory entelep tur.
Óńirlerden qarjylandyrýdyń jetispeýshiliginen klınıkalarda josparly emdeýge jatqyzý kezegi uzaryp ketken. Mysaly, Almaty qalasynda josparly emdelýge kezegi 2023 jyldyń naýryzyna deıin qalyptasyp qoıǵan»,-degen depýtat birneshe usynys aıtty. Olar:
1. Medıtsınalyq uıymdardyń qarjy tapshylyǵyn shuǵyl sheshý;
2. Bıýdjet pen tarıfterdi búkil ústemeaqylarǵa (jalaqyny kóterý, biliktilik sanattary úshin tólemder, baǵanyń ósýi jáne t. b.) sáıkes josparlaý jáne jańa qarjy jyly bastalǵanǵa deıin tarıfterdi qaıta qaraý;
3. Densaýlyq saqtaý mınıstrligi men Áleýmettik medıtsınalyq saqtandyrý qorynyń bıýdjetti utymdy bólýine ishki jáne syrtqy aýdıt júrgizý.
