Depýtat medıtsınalyq saqtandyrýǵa qarajattyń az bólinetinin synǵa aldy
«2022 jylǵa medıtsınalyq kómek kórsetýge bólingen qarjy resýrstarynyń jetkiliksiz kólemine baılanysty, medıtsınalyq uıymdardy jetkiliksiz qarjylandyrýǵa qatysty kúrdeli jaǵdaı oryn aldy. Al bul qazirdiń ózinde, onyń sapasyn aıtpaǵanda, halyqty medıtsınalyq qyzmetpen qamtýda baıqalýda. Medıtsınalyq qyzmetkerler eki ottyń arasyna túskendeı boldy, bir jaǵynan saqtandyrylǵan azamattar zańdy túrde kómek kórsetýdi talap etedi, al ekinshi jaǵynan Áleýmettik medıtsınalyq saqtandyrý qory qarjylandyrý josparynan aspaýdy talap etedi. Sonymen qatar, ÁMSQ belgilengen jospardan tys túsken aqshany artyǵymen oryndaý retinde alyp, uıymdardyń onsyz da jetkiliksiz bıýdjetin oryndalmaǵan somaǵa qysqartady», - dedi depýtat Májilistiń jalpy otyrysynda.
Óz saýalynda depýtat KT, MRT, ÝDZ, zerthanalyq taldaýlar, beıindi mamandardyń konsýltatsııasy sııaqty mańyzdy tekserýler kiretin barlyq DEAK ishinen tek stomatologııalyq qyzmetter ǵana BMSK dárigeriniń joldamasynsyz, óz betinshe júginý arqyly júrgiziletinin, bul otbasylyq dáriger qaǵıdatyn buzatynyn aıtty.
«Aıdyń sońynda emhanalarǵa stomatologııalyq qyzmetter úshin mıllıondaǵan shottar keledi jáne qor stomatologııalyq klınıkalardyń barlyq shottaryn birinshi kezekte jabýǵa jáne uıymdarǵa kórsetilgen qyzmetterdiń senimdiligi men durystyǵyn ózderi tekserýine mindetteıdi. 2022 jylǵy 1 qańtardan bastap dárigerlerdiń eńbekaqysynyń orta eseppen 30%-ǵa ósýine baılanysty bazalyq tarıf tek 9,8%-ǵa, KTS 12%-ǵa ulǵaıdy, bul dárilik zattardy satyp alý jónindegi kásiporyndardyń, MÓ, kommýnaldyq qyzmetterdiń shyǵystaryn jáne jalaqyǵa arnalǵan shyǵystaryn da tolyq ótemeıdi. Mysaly, IV sanattaǵy jedel járdem tarıfteri tómen: bir turǵynǵa 39-44,8 teńge, bul is júzinde shyǵystardy tek 30%-ǵa jabady. Iyq býynyń rentgenografııasynyń tarıfy 880 teńge, hırýrtyń keńesi 2068 tenge, t.b. Medıtsınalyq qyzmetterdiń barlyq basqa tarıfterinde de osyndaı jaǵdaı baıqalýda», - dedi G. Nurymova.
Bul problemalar Pavlodar, Jambyl oblystarynda, Nur-Sultan qalasynda jáne elimizdiń barlyq óńirlerinde bar.
Sonymen qatar, 2021 jylǵy memlekettik aýdıtke sáıkes, Densaýlyq saqtaý mınıstrligi - 7,4 mlrd teńgeni jáne MÁMS qory - 2,3 mlrd teńgeni ıgermegen. Medıtsınalyq qyzmetter tarıfterin kóterýge qarajattyń tolyq bólinbeýi jáne osynyń saldarynan qarjylandyrýdyń jetpeýi kredıtorlyq bereshektiń paıda bolýyna, halyqqa medıtsınalyq qyzmet kórsetý qoljetimdiliginiń tómendeýine, shaǵymdardyń týyndaýyna jáne jalpy áleýmettik shıelenistiń ósýine alyp keledi.
«Osy rette QR Densaýlyq saqtaý mınıstrligi tarıfterdi naqty shyǵystarǵa saı keltirsin jáne jańa qarjy jylyna deıin tarıfterdi bekitsin. Al Mindetti medıtsınalyq saqtandyrý qoryna toqsan aralyǵynda medıtsınalyq uıym ishinde qarajatty qaıta bólý tetigine ruqsat etilsin. MÁMS júıesinde aılyq josparǵa baılanystyrý bolmaýy tıis, tólem halyqtyń qajettiligine sáıkes medıtsınalyq qyzmetterdiń naqty oryndalǵan kólemi boıynsha júrgizilýi tıis. Balalar men júkti áıelderge josparly stomatologııalyq qyzmetter qatań túrde BMSK dárigerleriniń joldamasy boıynsha júrgizilsin jáne ary qaraı qyzmetterdi jetkizýshilermen tikeleı shart jasalsyn. Áleýmettik medıtsınalyq saqtandyrý qor men medıtsınalyq qyzmetter sapasy komıtetiniń oryndaý jáne aıyppul salý sapasyn baqylaý ókilettikterin naqty bólý qajet. ÁMSQ qarjyny ózi bólip, sapasyn ózi teksere almaıdy jáne aıyppul sanktsııalaryn sala almaıdy», - deıdi depýtat.
