Depýtat Maıra Aısına: Zań adamdardyń jumys isteýine bóget jasamaýy qajet
Sonymen qatar, halyq qalaýlysy óziniń jáne áriptesteriniń jumysshylardy istep jatqan jumysynan buryp, bir jerge jınaýǵa qarsy ekenin, lajy bolsa, sol jumys oryndaryna ózderi baryp, árkimmen jeke sóılesýdi qalaıtyndaryn jetkizdi.
«Bizdiń bilgimiz keletini, biz qabyldaǵan zańdardyń sizderge qanshalyqty kómektesetini nemese, kerisinshe zııanyn tıgizetini. Eger de olar sizderge qolaısyzdyq týdyratyn bolsa, biz sizderdiń taraptaryńyzdan sáıkesinshe usynystar qabyldap, ózgertýler engizýge daıynbyz. Jap-jaqsy ıdeıalar zańǵa aınalyp, qarapaıym halyqqa jetkenshe, adam tanymastaı ózgerip, sizderdiń jumys jasaýlaryńyzǵa qolbaılaý bolyp jatatyn kezderi de joq emes. Biz osyndaı kezdesýlerdi sondaı keleńsizdikterdiń aldyn alý úshin uıymdastyramyz», - dep atap ótti M. Aısına.
Ol sondaı-aq, árbir saılaýshynyń turmystyq máseleleri de shette qalyp qoımaýy kerektigin basa aıtty. «Balabaqsha, mektep, aýrýhana, baspana sııaqty tolyp jatqan turmystyq máseleler de bar. Biz sondaı máselelerge de jeke-jeke qol ushyn berýge múddelimiz», - dedi depýtat.
Osydan keıin jınalǵandarǵa «Qoljetimdi baspana-2020» memlekettik baǵdarlamasyn iske asyrý barysyndaǵy májilismenderdiń atqaryp otyrǵan qyzmetine toqtaldy. Onyń aıtýynsha, Parlament osy baǵdarlamany júzege asyrýmen aınalysatyn Úkimetti qatal baqylap otyrady.
«Úkimetke bul unamaıdy, biz sonda da osy máselelerge qanyq bolýǵa umtylamyz. Ótken jyly biz arnaıy parlamenttik tyńdaý ótkizip, Úkimetten baǵdarlamany qalaı iske asyryp jatqanyn jáne qarjyny qaıda jumsap jatqanyn suradyq. Biz baǵdarlamanyń barlyq 9 baǵytyn zerttep shyqtyq. Bıyl maýsym aıynda Parlamenttiń Áleýmettik-mádenı damý komıtetinde aralyq esep júrgizdik. Jeltoqsan aıynda olardy taǵy bir tyńdaımyz, eger de bergen ýádeleriniń oryndalmaı jatqanyn kórsek, tıisti sharalardy qoldanamyz», - dedi depýtat.
Kezdesý barysynda depýtat jumysshylardyń suraqtaryna jaýap berip, aryz-shaǵymdaryn tyńdady.