Depýtat máıitterdi tasymaldaý máselesin kóterdi
NUR-SULTAN. QazAqparat - QR Parlament Májilisiniń depýtattary sot-medıtsınalyq saraptama qyzmetin jetildirý máselesin kóterdi. Osyǵan oraı, olar QR Ádilet mınıstri Marat Beketaevqa depýtattyq saýal joldady, dep habarlaıdy QazAqparat tilshisi.
Depýtat Záýresh Amanjolovanyń aıtýynsha, elimizde sot-medıtsınalyq saraptama qyzmetiniń jaǵdaıy máz emes. Qazirgi kezde arnaıy ortalyqtyń 20 jergilikti qurylymy bar. Solardyń ishinde Qaraǵandy, Qyzylorda, Mańǵystaý men Shyǵys Qazaqstan oblystary, Almaty men Nur-Sultannyń sot-medıtsınalyq máıitxanalary ábden tozǵan. Atalǵan nysandar ótken ǵasyrdyń 1915-1950 jyldary salynǵan.
«Respýblıkada sot-medıtsınalyq bólimsheler jetispeıdi. Sonyń saldarynan Mańǵystaý men Aqmola oblysynda máıitterdi júzdegen shaqyrymǵa tasyp júredi. Al Pavlodar oblysynda eki-aq bólimshe bar. Olar Ekibastuz ben Aqsý qalasynda ornalasqan», - dedi Z.Amanjolova búgingi plenarlyq otyrysta.
Onyń sózine qaraǵanda, maman tapshylyǵy da barynsha baıqalady. Búginde alty memlekettik medıtsınalyq ýnıversıtettiń ekeýi ǵana sot-medıtsınalyq saraptama mamandaryn daıarlaıdy.
«Osyǵan baılanysty jergilikti atqarýshy organdarymen birlese otyryp, jańa ǵımarattardy salý máselesin qarastyrý qajet dep sanaımyz. Sonyń barlyǵyn zamanaýı qural-jabdyqtarmen jáne tońazytqysh qurylǵylarmen qamtamasyz etý kerek. Qazirgi ǵımarattardy kúrdeli jóndeýden ótkizgen jón. Al zertxanalarǵa ozyq apparattar men reagentterdi jetkizý kerek. Sot-medıtsınalyq saraptama mamandaryn daıarlaý baǵdarlamasyn da qaıta qarap shyqqan mańyzdy. Aýyldy jerlerde jumys isteıtin mamandardy baspanamen qamtý jaǵyn umytpaýymyz qajet», - dep atap kórsetti Z.Amanjolova.
