Depýtat: Mal urlyǵyna qatysty polıtsııanyń jaýapkershiligin arttyrý kerek
NUR-SULTAN. QazAqparat – Májilistiń jalpy otyrysynda depýtat Ǵazız Qulahmetov Shyǵys Qazaqstan oblysy sharýalary shyǵynǵa batyp jatqanyn, olardyń maly jıi urlananatynyn aıtyp, másele kóterdi, dep habarlaıdy QazAqparat tilshisi.
QHP fraktsııasynyń depýtattyq saýalynda mal urlaý, shóp órteý sııaqty qylmystardyń birqatar faktisi kórsetilgen.
«Mal ıeleri kúdiktilerdi polıtsııaǵa kórsetken kúnniń ózinde budan eshqandaı nátıje shyqpaıtynyn aıtyp, dabyl qaǵyp otyr», – dedi depýtat Úkimet basshysynyń atyna joldaǵan saýalynda.
Depýtat Ǵazız Qulahmetovtyń aıtýynsha, oblystyq polıtsııa departamentiniń deregine qaraǵanda, óńirde mal urlyǵy 2019 jylmen salystyrǵanda 12 paıyzǵa tómendegen, al iri qara mal basynyń bir bóligi zardap shekkenderge qaıtarylǵan. Alaıda jergilikti turǵyndardyń pikirinshe, bul baǵyttaǵy jumys óte nashar júrgizilýde.
Depýtat mal urlaý sııaqty máseleler fermerlerdiń damýyna, atap aıtqanda, eldiń azyq-túlik qaýipsizdigin qamtamasyz etýge aıtarlyqtaı zııan keltiretinine toqtalǵan.
«Taǵy bir máseleni atap ótken jón. Katonqaraǵaı aýdanynda eki veterınarlyq zerthana jabylǵannan beri eki jyldan astam ýaqyt ótti. Saldarynan aýdan turǵyndary mal jáne ara sharýashylyǵy ónimderin zerthanalyq saraptamasyz satyp otyr. Negizinen mundaı ónimderdi mektepterge, balabaqshalarǵa, ashanalarǵa, kafelerge, meıramhanalarǵa tikeleı jetkizedi.Al saraptama júrgizý jáne ónimniń tazalyǵyn rastaıtyn anyqtama alý úshin 200 shaqyrym jerdegi kórshi aýdanǵa baryp-kelýdiń óz qıyndyǵy bar», – dedi Ǵazız Qulahmetov.
Sondaı-aq depýtattyq saýalda mal urlyǵy oryn alǵan aýyldar men aýdandardaǵy polıtsııa basshylarynyń qyzmettik jaýapkershiligin arttyrý jaıyn qarastyrýǵa keńes berilgen.
Onyń aıtýynsha, ákimderdiń jergilikti jerlerdegi jumysyna da syn kózben qaraǵan jón. Sonymen qatar asyl tuqymdy maldy urlaǵany úshin jazany qatańdatý máseleni sheshýge kómektesedi degen boljam bar.
