Depýtat mádenıet salasy qyzmetkerleriniń jalaqysyn kóterýdi usyndy
ASTANA. KAZINFORM – Uly murany ultpen uıystyrǵan salaǵa serpin kerek. Bul jóninde Májilis depýtaty Nartaı Sársenǵalıev Premer-mınıstrdiń orynbasary - QR Mádenıet jáne aqparat mınıstri Aıda Balaevaǵa joldaǵan depýtattyq saýalynda málimdedi.
Onyń sózinshe, aýyldaǵy mádenıet úıinde 20 jyl eńbek etken adam 200 myń teńge kóleminde aılyq alady. Al qaladaǵy mádenıet úıi qyzmetkerleriniń jalaqysy tipten az. Sebebi olarǵa aýylǵa qosylatyn 25% ústeme qosylmaıdy.
– Memleket basshysy Qasym-Jomart Toqaev: «Mádenıet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi. Biz – Uly dalada tamyr jaıǵan biregeı mádenıettiń zańdy muragerimiz» dep shegelep aıtqan edi. Sondyqtan uly murany ultpen uıystyrǵan salaǵa serpin kerek. Mádenıet salasynyń maıtalmandary máseleni mádenıetti jetkizýge tyrysqanymen, qolda bar hattarǵa qarasaq, ashynǵandary anyq baıqalady, – dedi depýtat.
Sonymen birge N. Sársenǵalıev máseleni sheshýdiń naqty joldaryn usyndy.
Onyń aıtýynsha, aýyldyq jáne aýdandyq mádenıet uıymdaryna kúrdeli jóndeý jasap, materıaldyq bazasyn jańartý qajet. Sonymen qatar mádenıet salasy qyzmetkerlerine mereke jáne demalys kúnderi atqarǵan jumysy úshin zańnamaǵa sáıkes qosymsha aqy tóleýdi qatań baqylap, olardyń jumys ýaqyty men eńbek júktemesi naqty reglamenttelýi tıis.
– Mádenıet salasyndaǵy mamandardy qoldaý maqsatynda olardyń kótermeaqy, sanıtarlyq-kýrorttyq demalys, turǵyn úı sekildi áleýmettik paketke qol jetkizýi úshin jumys ótili, belsendiligi, jetistigi eskeriletin naqty krıterııler engizip qoldaý kerek. Sondaı-aq mádenıet salasy qyzmetkerleriniń qoǵam damýyndaǵy aıryqsha eńbegin eskerip, olardyń tabysyn turaqty túrde arttyrý tetigin qarastyrý qajet, – dedi depýtat.
Budan bólek, ol mádenıet qyzmetkerleriniń biliktiligin arttyrý jáne qaıta daıarlaý júıesin jetildirip, sheteldegi úzdik mádenı uıymdarmen tájirıbe almasý múmkindigin bekitý qajet ekenin málimdedi.
Aıta keteıik buǵan deıin Qyrǵyzstanda mádenıet salasy qyzmetkerleriniń jalaqysy 100%-ǵa ósetinin jazǵanbyz.
