Depýtat M.Tinikeev jol erejelerin buzǵany úshin salynatyn aıyppul mólsherin tómendetýdi usyndy
ASTANA. QazAqparat - Májilis depýtaty Muhtar Tinikeev jol júrisi erejelerin buzǵany úshin salynatyn aıyppuldar mólsherin tómendetýdi usynady. Bundaı pikirde halyq qalaýlysy búgin Parlament Májilisiniń jalpy otyrysynda «Jol júrisi týraly» QR zańyna ózgerister men tolyqtyrýlar engizý týraly» zań jobasyn talqylaý barysynda aıtty.
Depýtattyń sózine qaraǵanda, Qazaqstanda jol júrisi erejelerin buzǵany úshin salynatyn aıyppul mólsheri óte joǵary bolyp otyr, tipti keıde 200 myń teńgege deıin jetedi. Bul rette M.Tinikeev keı jaǵdaıda álgi avtokólik bir otbasyn asyrap otyrǵan jalǵyz ǵana tabystyń kózi ekenin de alǵa tartady. «Eger biz qandaı da bir únemdeý máselesi týraly tetikti engizgimiz kelse, onda dál osy máseleni qarap, osy máselege jeńildik bergenimiz durys shyǵar. Onyń ústine bizdikindeı deńgeıdegi jalaqy men bizdiń eldegideı tabys kózi bola tura, aıyppuldyń anadaı joǵary bolýy da múmkin emes qoı», - dedi M.Tinikeev. Sonymen qatar depýtat Qazaqstanda is júzinde qyzmetke kirisip jatqan ámbebap polıtseılerdiń qyzmetine de syn aıtyp ótti. «Ámbebap polıtseıler paıda boldy, bul óte sátsiz tájirıbe. Eger jol-patrýldik polıtsııasy óz quqyqtaryn, zańdaryn biletin bolsa, ámbebap polıtseıler jol ústine «taıaq» ustap shyǵýdy ǵana meńgergen», - dedi depýtat Tinikeev.
