Depýtat M. Tinikeev kollektorlyq qyzmet týraly zań jobasyn «halyqqa qarsy» dep aıyptady
ASTANA. QazAqparat - Búgin Májiliste «Kollektorlyq qyzmet týraly» zań jobasynyń tanystyrylymy barysynda depýtat Muhtar Tinikeev atalǵan qujatty «halyqqa qarsy» dep málimdedi.
Eske salaıyq, zań jobasyn QR Ulttyq banki ázirlegen bolatyn.
«Birden aıtaıyn, men bul zań jobasyna qarsymyn. Óıtkeni, biz «banktik reketti» zańdastyrǵaly turmyz. Eger buryn árbir ekinshi deńgeıli bankterde ózderiniń kollektorlyq agenttikteri jumys istese, qazir Ulttyq bank olardyń bárin joımaqshy. Osylaısha, Ulttyq bank depýtattardyń qolymen «halyqqa qarsy» zań jobasyn qabyldatpaq», - dedi talqylaý barysynda Muhtar Tinekeev.
Onyń paıymynsha, zań jobasyn ázirleýshiler kredıtke batyp otyrǵan qarapaıym halyqtyń pikirin eskermegen. Bul rette depýtat eń birinshi kezekte elimizdegi qaptaǵan tutyný kredıtterin tártipke keltirýge shaqyrdy.
«Bizdiń 5 mln. astam azamattarymyz kredıt alypty. Olar erikkennen bundaı qadamǵa barmaǵany da túsinikti. Zańda keshki saǵat 21:00-den keıin boryshkerlermen jumys isteýge tyıym salynady dep otyr. Al qaısy kollektor bul týraly Ulttyq bankten suraıdy eken? Eshkim de suramaıdy. Olar ózderine qajetti qarajatty almaıynsha toqtamaıdy. Tutastaı alǵanda men zań jobasyn «shıki» dep sanaımyn», - dedi M. Tinikeev.
