Depýtat M.Aısına: Dene tárbıesine pán retinde qaraýǵa enjarlyq tanytpaý qajet

Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Maıra Aısına osylaı málim etti.

Depýtattyń aıtýynsha, deneshynyqtyrý - jalpy mádenıettiń quramdas bóligi. Sportpen aınalysatyn bala úshin dene tárbıesi densaýlyq saqtaýdyń tıimdi quraly ǵana emes, sonymen qatar qoǵamda tabysty adam bolýyna zor múmkindik beretin baǵyt bolýy tıis.  «Alaıda, búgingi tańda kompıýtermen áýestengen jetkinshekterge dene tárbıesi, sportpen belsene aınalysý, kóp qımyldaý týraly keńes berý - aǵysqa qarsy júrýmen teń», - degen M. Aısına, elimizdegi mektepterde dene tárbıesi normatıvin aptasyna úsh saǵatqa aýystyrý boıynsha tyńǵylyqty qadamdar jasalǵanyn aıtty.

Biraq, depýtattyń paıymynsha, qujatty qabyldaý men ony júzege asyrýdyń nátıjesi eki túrli bolyp otyr. «Óıtkeni, búgingi kúni dene tárbıesine mektep páni retinde qaraýǵa muǵalimder men balalardyń ózderi de, sondaı-aq ata-analar tarapynan da enjarlyq tanytylyp otyr. Qazirgi tańda mektepterde dene tárbıesiniń syndarly sabaqtary qamtylmaǵan. Balalardyń kópshiligi osy pánge múldem selqos. Al qımyl-qozǵalystyń azdyǵy, oqý júktemesiniń shamadan tys artýy, qurǵaq tamaqtaný saldarynan árbir ekinshi bala aýrýǵa shaldyǵyp otyr», - deıdi M. Aısına.

Osyǵan oraı depýtat buqaralyq sportty, dene tárbıesin nasıhattaýǵa yqpal etetin sharalar keshenin daıyndaý qajettigin alǵa tartady.