Depýtat kvazımemlekettik kompanııalardy turǵyn úı qurylysyna jolatpaýdy usyndy
ASTANA. KAZINFORM — Májilis depýtaty Erlan Barlybaev Premer-mınıstr Oljas Bektenovtiń atyna saýal joldap, kvazımemlekettik kompanııalardyń qurylys kompanııalarymen básekege túsýine shekteý qoıýdy usyndy.
— Birneshe kún buryn BAQ «Samruk-Kazyna Construction» AQ basqarýshy dırektory men «Dorstroıtrest» JShS basshysynyń ústinen júrip jatqan qylmystyq tergeý aıaqtalǵanyn jazdy. Qarjylyq monıtorıng agenttiginiń málimeti boıynsha olar «Kóktóbe» turǵyn úı kesheniniń qurylysy boıynsha berilgen 2,6 mlrd teńge avans qarajatyn jymqyrdy degen kúdikke ilinip otyr. Tergeý málimetine súıensek, bul qarajat qurylyspen qatysy joq qaryzdardy jabýǵa jáne avtomobıl satyp alýǵa baǵyttalǵan. Onyń ústine 650 mln teńgedeı aqsha jalǵan kelisimsharttar arqyly affılırlengen JShS shotyna aýdarylyp, qolma-qol aqshaǵa aınaldyrylǵan, — dedi depýtat.
Aıtýynsha, osynyń saldarynan qurylys merzimi keshigip, túrli zańsyzdyqtarǵa jol berilgen.
— Bul jerde problema aqsha jymqyrýda ǵana emes. Kvazımemlekettik kompanııa turǵyn úı qurylysyna qandaı negizde kıligip júr? Sonda memlekettik qoldaýsyz jumys istep júrgen jeke kompanııalar bıýdjetten tikeleı nemese janama qarjy alatyn ulttyq holdıngterdiń enshiles kompanııalarymen qalaısha básekege túse alady? Mundaı tásil ádil básekeni joıyp, naryqtyq qatynastardy buzady, jeke bıznesti naryqtan yǵystyrady, — degen depýtat birneshe usynys aıtty.
Erlan Barlybaevtyń sózinshe, kvazımemlekettik kompanııalardyń turǵyn úı qurylysy sııaqty ekonomıkanyń básekeli sektorlaryna kıligýine tyıym salý kerek.
— Bul sektorda jeke kásipkerler tabysty eńbek etip jatyr. Qurylys, jeńil jáne tamaq ónerkásibi, qyzmet kórsetý salasy sııaqty básekeli sektorǵa kvazımemlekettik kompanııalardyń kıligý derekterine keshendi ınventarızatsııa júrgizý qajet. Kvazımemlekettik kompanııalardyń básekeli emes salalarǵa kıligýin shektep, kezeń-kezeńmen shyǵarýǵa baǵyttalǵan memlekettik saıasatty ázirlep, bekitýdi usynamyz, — dedi Erlan Barlybaev.
Al depýtat Murat Ergeshbaev Qytaıda Qazaqstan unyn satatyn ókildik qurýdy usyndy.