Depýtat Qostanaıda kóppáterli turǵyn úıdi basqarý máselesin kóterdi
QOSTANAI. KAZINFORM – Májilis depýtaty, JSDP fraktsııasynyń múshesi Nurlan Áýesbaev Qostanaı oblysyna jumys sapary barysynda «Bılik. Halyq. Yntymaq» atty aımaqtyq konferentsııaǵa qatysty. Іs-sharada jergilikti ózin-ózi basqarýdy nyǵaıtý, memlekettik qyzmetterdiń sapasyn kóterý, sondaı-aq azamattardyń sheshim qabyldaý úderisine belsendi qatysýyn qamtamasyz etý máseleleri talqylandy.
Konferentsııaǵa jergilikti atqarýshy organdardyń ókilderi, qoǵamdyq birlestikterdiń jetekshileri jáne óńirdiń belsendi turǵyndary qatysty. Jıynnyń basty maqsaty – bılik pen qoǵam arasynda ashyq ta nátıjeli dıalog ornatyp, jergilikti atqarýshy organdardyń jumys tıimdiligin arttyrýǵa baǵyttalǵan naqty usynystardy qalyptastyrý boldy.
Konferentsııaǵa qatysýshylar kóppáterli turǵyn úıdi basqarý jáne múlik ıeleri birlestikteriniń (MIB) qyzmetin uıymdastyrý máselelerine aıryqsha nazar aýdardy. «Meniń úıim» Qostanaı oblystyq qaýymdastyǵynyń tóraǵa mindetin atqarýshy Saılaý Asylbaev osy saladaǵy problemalardyń áli de ózekti ári ótkir kúıinde turǵanyn atap ótti.
– Qostanaı oblysyndaǵy kópqabatty úılerdiń jartysynan astamy áli kúnge deıin basqarý nysanyn aıqyndamaǵan. Sonyń saldarynan aýlalar abattandyrylmaı, jóndeý jumystary sozylyp keledi, al turǵyndar óz qarjysynyń qaıda jumsalyp jatqanyn bilmeıdi. Múlik ıeleri birlestikteri men qarapaıym turǵyndarǵa saýatty keńes, júıeli baqylaý jáne turaqty qoldaý qajet. Biz depýtattarmen jáne jergilikti bılik organdarymen birlese otyryp, bul salada tártip ornatýǵa daıynbyz. Eger turǵyndar naqty nátıjeni kórse, MIB-ke de, kondomınıýmdarǵa da degen senim arta túser edi, – dedi.
Budan bólek, Nurlan Áýesbaev «Áýejaı» shaǵyn aýdanynyń Bastapqy partııa uıymy belsendilerimen júzdesti. Kezdesý barysynda uıymnyń strategııalyq mindetteri, aldaǵy josparlary jáne turǵyndardy qoǵamdyq bastamalarǵa keńinen tartý tetikteri sóz boldy. Sondaı-aq shaǵyn aýdannyń ınfraqurylymyn jetildirý, áleýmettik qoljetimdilikti arttyrý jáne halyqtyń ómir sapasyn jaqsartý jóninde birqatar usynystar ortaǵa salyndy.
– Áleýmettik qoldaý, ınfraqurylym, turǵyn úı, bilim berý jáne densaýlyq saqtaý – bul máseleler halyqty áli de alańdatyp otyr. Eshbir pikir nazardan tys qalmaıdy. Barlyq ótinish-usynystar nazarǵa alynyp, olardy sheshý joldaryn tıisti qurylymdarmen birlese qarastyramyz, – dedi depýtat.
Konferentsııa men óńirdegi kezdesýlerdiń qorytyndysynda birqatar naqty qadamdar belgilendi: jergilikti atqarýshy organdardyń qyzmetine qoǵamdyq baqylaýdy kúsheıtý, turaqty jumys isteıtin dıalog alańdaryn qalyptastyrý, jergilikti bastamalardy qoldaý, sondaı-aq kóppáterli turǵyn úılerdi basqarý salasynda júıeli tártip ornatý.
Nurlan Áýesbaev turǵyndar men belsendiler kótergen barlyq usynys retke keltirilip, tıisti memlekettik organdarǵa joldanatynyn, al olardyń oryndalý barysy depýtattyq qadaǵalaýda bolatynyn erekshe atap ótti.
Al Májilis depýtaty, JSDP fraktsııasynyń múshesi Naýryz Saılaýbaı Qapshaǵaıdaǵy № 6 jaǵajaıda jumys isteıtin kásipkerlermen kezdesken edi. Basqosýda jaǵalaý aýmaǵyn abattandyrý, ınfraqurylymdy jańǵyrtý jáne bıznestiń múddesin qorǵaý máseleleri talqylanǵan bolatyn.