Depýtat Kóshpendiler oıynyna bılet satyp ala almaı júr

ASTANA. KAZINFORM – Májilistiń Áleýmettik-mádenı damý komıtetiniń otyrysynda Týrızm jáne sport mınıstri Ermek Marjyqpaev Astanada ótetin Dúnıejúzilik Kóshpendiler oıyndaryna bılet satyla bastaǵanyn aıtqan. Alaıda Májilis depýtaty Dáýlet Muqaev bul málimettiń rastyǵyna kúmán keltirdi.

«Siz aıtyp otyrǵan «Zakaz bıletov» saıtynan oıyndardyń bıletin ala almaı otyrmyn. Men sol saıttyń jaýabyn oqyp bereıin. Sizder bir nárse aıtasyzdar, al iske kelgende múldem basqalaı bolyp shyǵady. «Qurmetti dostar, Besinshi Dúnıejúzilik Kóshpendiler oıynyna bılet satý kezeń-kezeńimen júredi. Keıbir nysandarda kúrdeli jóndeý júrip jatyr – kórermenderdi ornalastyrý syzbasy ózgerip jatyr. Osyǵan baılanysty oıyndardyń ashylý, jabylý saltanattaryna arnalǵan bıletter keıin satyla bastaıdy. Oflaın kassalar jarys bastalardyń aldynda, qyrkúıekte 3 nysanda ashylady» dep jazylǵan. Qazir bılet satylymda joq dep aıtqandaryńyz durys bolatyn shyǵar», - dedi depýtat.

Mınıstrlik mamandary «Jekpe-jek» saraıynda ótetin is-sharanyń bárine bılet satylyp jatqanyn aıtyp aqtaldy.

«Jaqsy, siz aıtyp otyrǵan bıletterdi qaı jerden satyp alaıyn?» - dep surady Dáýlet Muqaev.