Depýtat: Konstıtýtsııadaǵy ózgerister bılik pen qoǵam arasyndaǵy senimdi nyǵaıtady
ASTANA. KAZINFORM — Konstıtýtsııalyq ózgerister azamattardyń quqyqtaryn qorǵaýǵa jáne memlekettik basqarýdyń tıimdiligin arttyrýǵa baǵyttalǵan. Bul týraly Májilis depýtaty Dınara Naýmova aıtty.
Depýtat búgin talqylanyp jatqan Konstıtýtsııa jobasy eldiń konstıtýtsııalyq júıesin qazirgi zamanǵy talaptar men qoǵamnyń suranystaryn eskere otyryp odan ári damytýǵa baǵyttalǵanyn atap ótti.
Onyń aıtýynsha, qoldanystaǵy Konstıtýtsııa memlekettiń qalyptasýynda sheshýshi ról atqaryp, egemendik negizderin, azamattardyń quqyqtary men bostandyqtaryn qamtamasyz etti. Sonymen qatar, qazirgi áleýmettik jáne ınstıtýtsıonaldyq syn-qaterler memlekettik basqarý júıesi men quqyqtyq tetikterdi ózgermeli jaǵdaılarǵa beıimdeýdi talap etedi.
— Konstıtýtsııa — tek negizgi quqyqtyq qujat qana emes, sonymen birge memleket pen qoǵam arasyndaǵy senimniń negizi. Osy turǵyda usynylyp otyrǵan ózgerister bılik pen azamattar arasyndaǵy alshaqtyqty qysqartýǵa, memlekettik basqarýdyń ashyqtyǵyn arttyrýǵa jáne naqty qoǵamdyq suranystarǵa baǵdarlanýǵa baǵyttalǵan, — dedi Dınara Naýmova.
Naýmovanyń aıtýynsha, joba aıasynda adam quqyqtary men bostandyqtaryn qorǵaý máselelerine erekshe nazar aýdarylǵan. Atap aıtqanda, sot tóreliginiń ádildigin kúsheıtýge, sondaı-aq azamattardyń múddelerine tikeleı áser etetin, onyń ishinde tsıfrlandyrý jaǵdaıyndaǵy sezimtal salalarda naqty kepildikterdi qamtamasyz etýge basymdyq berilip otyr.
Sonymen qatar, depýtat memlekettik basqarýdyń tıimdiligin arttyrýǵa baǵyttalǵan ınstıtýtsıonaldyq ózgeristerge de toqtaldy. Onyń pikirinshe, Quryltaı túrindegi birpalataly Parlamentke kóshý jáne Halyq keńesin qurý qoǵamdyq pikirdi eskere otyryp, sheshimderdi neǵurlym jedel ári saralanǵan túrde qabyldaýǵa múmkindik beredi.
— Jalpy alǵanda, usynylyp otyrǵan joba áleýmettik ádilettilikti nyǵaıtýǵa, quqyqtyq mádenıetti damytýǵa jáne memlekettiń qoǵam aldyndaǵy jaýapkershiligin arttyrýǵa baǵyttalǵan. Bul bastama turaqtylyq pen jańǵyrýdyń bir-birin tolyqtyra alatynyn kórsetip, ornyqty damýdy jáne azamattardyń senimin saqtaýǵa jaǵdaı jasaıdy, — dep túıindedi depýtat.
Sonymen birge joba bılik tarmaqtarynyń arhıtektýrasyn naqtylaýdy, onyń ishinde vıtse-prezıdent ınstıtýtyn engizýdi kózdeıdi. Bul sharalar qazirgi zamanǵy úderisterdiń kúrdelene túsýi jaǵdaıynda memlekettik basqarý júıesiniń ornyqtylyǵy men sabaqtastyǵyn qamtamasyz etýge baǵyttalǵan.
Osyǵan deıin Jandar Asan jańa Konstıtýtsııa jobasynyń ózegi – adam quqyǵy ekenin aıtqan edi.