Depýtat kommýnaldyq qyzmet jumysshylaryn memlekettik baspana alatyndar tizimine qosýdy usyndy
«Byltyr Memleket basshysy Qasym-Jomart Toqaev «Halyq birligi jáne júıeli reformalar-eldiń órkendeýiniń berik negizi» atty Qazaqstan halqyna Joldaýynda biryńǵaı turǵyn úı baǵdarlamasyn qurý mindetin belgiledi. Endigi kezekte, jańa turǵyn úı baǵdarlamasy aıasynda buryn memlekettik baǵdarlamalarmen qamtylmaǵan áleýmettik toptardyń múddesin eskerý qajet. Bul sanatqa sharýashylyq júrgizý quqyǵyndaǵy memlekettik kommýnaldyq kásiporyndardyń qyzmetkerleri jáne taǵy basqalar jatady», - dedi B. Sartbaev Premer-Mınıstrdiń orynbasary Roman Sklıardyń atyna joldaǵan saýalynda.
Onyń paıymynsha, jumysy eldi mekender ári tutas óńirlerdiń qaýipsizdigi men tynys-tirshiligin qamtamasyz etetin kommýnaldyq qyzmetterdiń jumysshylary turǵyn úı alý nemese jeńildetilgen talaptary bar baǵdarlamalardan tys qalmaýy tıis.
«2022 jyldyń jazynda «Astana sý arnasy», «QazSýShar» kásiporyndarynda saılaýshylarmen kezdesý kezinde jyldar boıy eńbek etip kele jatqan qyzmetkerler týraly másele qozǵaldy. Máselen, Qanysh Sátpaev atyndaǵy sý arnasynyń qyzmetkerleri turǵyn úı satyp alý úshin memlekettik baǵdarlamalardyń eshqaısyna qatysa almaıdy. Sondaı-aq Tótenshe jaǵdaılar mınıstrligine jatatyn sharýashylyq júrgizý quqyǵyndaǵy «Rezerv» memlekettik kásiporyny sııaqty uıymdar da osyndaı másele bar. Munda da qyzmetkerler kommýnaldyq nemese memlekettik turǵyn úı alý úshin kezekke tura almaıdy, al kommertsııalyq turǵyn úı satyp alýǵa olar úshin arnaıy jeńildikter joq. Bul mekemelerdiń qyzmeti memlekettik dotatsııa esebinen júzege asyrylady, qyzmetkerlerdiń jalaqy deńgeıi kommertsııalyq sektor mamandarymen salystyrǵanda birshama tómen», - dedi depýtat.
Osy oraıda ol kommýnaldyq qyzmet jumysshylaryn memlekettik turǵyn úı alýǵa úmitker adamdar tizimine qosýdy surady.
«Jumysy eldi mekender ári jalpy óńirlerdiń qaýipsizdigi men tynys-tirshiligine tikeleı áser etetin kommýnaldyq qyzmet adamdary úshin turǵyn úı alý múmkindikterin nemese baspana satyp alý úshin jeńildetilgen paıyzy tómen nesıe berý baǵdarlamasyn iske qosý mańyzdy. Kommýnaldyq kásiporyndardyń jas mamandaryn otbasylyq jataqhanalarmen qamtamasyz etý kerek», - dedi depýtat.
