Depýtat kolledjderde shabandoz ben atbegi daıyndaýdy usyndy

ASTANA. KAZINFORM — Shymkenttegi fýtbol klýbynyń bir jyldyq bıýdjeti búkil ulttyq sportqa bólinetin aqshadan birneshe ese kóp.

Ulttyq sport joǵary mektebi bir jyldyq jumysyn qorytyndylaǵan jıynda Májilis depýtaty Amanjol Áltaı osyndaı derek keltirdi.

— Aramyzda Týrızm jáne sport mınıstrliginiń ókili otyr. Ulttyq sportqa bólinetin qarjynyń kólemin kóbeıtý kerek. Legıonerlerdiń qaltasyn qampaıtqanmen sport damymaıdy. Mysaly bir ǵana shymkenttegi fýtbol klýbyna bólinetin qarjy jalpy sportqa bólinetin qarajattan birneshe ese kóp. Sondyqtan ulttyq bolmysymyzdy, tól dıdarymyzdy aıqyndaıtyn ulttyq sporttan qarjy aıamaıyq, — dedi ol.

Depýtattyń aıtýynsha, keıbir óńirlerde ulttyq sport saıystaryn ótkizýge jaramdy stadıon da joq.

— Bizde ınfraqurylym jolǵa qoıylmaǵan. Keıbir aımaqtarda ulttyq sport jarystaryn ótkizetin stadıon da joq. Ulttyq sport respýblıkalyq aýqymda damý úshin ınfraqurylym máselesin júıeli túrde jolǵa qoıýymyz qajet dep oılaımyn. Ulttyq sportqa degen qoldaýdy zańnamalyq turǵyda áli de jetildire túsýimiz kerek. Jylqy sharýashylyǵyn damytýǵa arnalǵan zań qabyldandy. Osymen toqtap qalmaı, Ulttyq sport týraly arnaıy zań qabyldansa, salanyń joǵary keńistikke shyǵýyna jol ashylar edi, — deıdi Amanjol Áltaı.

Ulttyq sportta maman tapshylyǵy qatty sezilip jatqany da aıtyldy.

— Men birneshe mınıstrliktiń atyn bul jerde tegin atap otyrǵan joqpyn. Bul salada naqty kadrlar daıyndalý kerek. Bizde ulttyq sport salasyndaǵy kásibı mamandar daıyndaıtyn orta nemese joǵary bilim shańyraǵy joq. Kásiptik-tehnıkalyq kolledjderde de qarapaıym ǵana taǵashy, bapker, shabandoz sekildi mamandyqtar kásibı turǵyda daıyndalýy kerek, — dedi depýtat.

Buǵan deıin Amanjol Áltaı jas aqyndar balalarǵa arnap óleń jazbaıtynyn aıtqan edi.