Depýtat kóliktiń aldyńǵy terezesin qarańǵylaýǵa ruqsat berý usynysyn aıtty
ASTANA. KAZINFORM — Májilis depýtaty Oljas Quspekov avtokólikterdiń aldyńǵy búıir terezesin aqyly túrde qarańǵylaýdy zańdastyrý týraly usynys aıtty.
— Men 2024 jyldan bastap Májilis alańynda da, qoǵamdyq talqylaýlar aıasynda da avtomobılderdiń aldyńǵy búıir terezesin qarańǵylaýdy zańdastyrý máselesin kóterdim. Bul shara ózekti qoǵamdyq suranystardy qanaǵattandyrý tetigi retinde ǵana emes, sonymen qatar bıýdjetke turaqty túsimderdiń tıimdi kózi retinde qarastyrylady. Ulttyq statıstıka bıýrosynyń resmı málimetteri boıynsha, 2025 jylǵy 1 mamyrdaǵy kezeńde elimizde 6 mln 176 myń kólik tirkeýde tur, onyń 86,5 paıyzy jeńil kólik. Avtoparktiń 5 paıyzy qamtylsa jáne ruqsat berýdiń ortasha quny 50 AEK bolsa da, bıýdjetke túsetin yqtımal túsimderdiń kólemi jylyna 50 mlrd teńgeden asýy múmkin. Bul qarajat ınfraqurylymdy qalpyna keltirýge ári damytýǵa — avtomobıl joldaryn jóndeýge jáne kútip ustaýǵa maqsatty túrde paıdalanylýy múmkin, — dedi Oljas Quspekov Premer-mınıstrdiń orynbasary — Ulttyq ekonomıka mınıstri Serik Jumanǵarınniń atyna joldaǵan saýalynda.
Onyń aıtýynsha, Keden odaǵynyń «Dońǵalaqty kólik quraldarynyń qaýipsizdigi týraly» tehnıkalyq reglamentine sáıkes, kem degende 70% jaryq ótkizgen jaǵdaıda aldyńǵy búıir áınekterde «tonırovkany» qoldanýǵa ruqsat etiledi. Bul talaptar kólik shynysyn qaraýǵylaýdy zańdastyrýdyń ulttyq tásiliniń negizin qalaýy kerek.
— Elimizde aqyly memlekettik qyzmetterdi paıdalanýdyń tabysty tájirıbesi bar. Máselen, 2024 jyly bıýdjet VIP-memlekettik nómirlerdi satýdan 15,8 mlrd teńge aldy, bul osyndaı sheshimderdiń tıimdiligin rastaıdy. Halyqaralyq tájirıbe de zańdastyrylǵan aqyly tonırovkanyń tıimdiligin rastady. Máselen, Qyrǵyz Respýblıkasynda tonırovkaǵa ruqsat berýden 2024 jyly bıýdjetke shamamen 4 mlrd teńge tústi. Ózbekstanda jaryq ótkizýge ruqsat 70%-dan bastap beriledi. BAÁ men Ońtústik Koreıada tehnıkalyq talaptar men baj salyǵyn tóleý kezinde aldyńǵy áınekterdi 50% jáne 40% deıin qarańǵylaýǵa ruqsat etiledi, — dedi depýtat.
Oljas Quspekov joǵaryda aıtylǵandardy eskere otyryp, Úkimetke kelesi usynystardy joldady:
— Birinshiden, ýákiletti organdarǵa ruqsattardy resimdep, bıýdjetke tıisti alymdar túsirý úshin, kem degende 70% jaryq ótkizgen jaǵdaıda avtomobılderdiń aldyńǵy búıir shynylaryn aqyly qarańǵylaýdy zańdastyrý tetigin ázirleý;
— Ekinshiden, tehnıkalyq baıqaý rásimderi jáne ózge de retteýshi tetikter arqyly shynydaǵy jaryq ótkizýdiń belgilengen parametrleriniń saqtalýyn tıimdi baqylaýdy qamtamasyz etý.
— Úshinshiden, kólik quralynyń sanatyna baılanysty ruqsat berýge saralanǵan tarıfterdi engizý múmkindigin qarastyrý, ıaǵnı ekonom, bıznes jáne premıým sanattary eskerilýi kerek.
Eske salsaq, buǵan deıin ІІM kólik terezelerin qarańǵylaý boıynsha talaptardy túsindirgen edi.