Depýtat kólikke zańsyz ornatylǵan Bi-LED shamdarǵa qatań tyıym salýdy surady
ASTANA. KAZINFORM — Májilis depýtaty Nartaı Sársenǵalıev Premer-mınıstr Oljas Bektenovtiń atyna joldaǵan saýalynda joldaǵy qaýipsizdik máselesin kóterdi.
— Óńirlerge jasaǵan issaparymyz barysynda halyq jol-kólik oqıǵasynyń kúrt óskenine alańdap otyr. Jyl basynda Prezıdent Qasym-Jomart Toqaev «Túrkistan» gazetine bergen suhbatynda da jol-kólik oqıǵalarynyń kóbeıgenin erekshe atap ótti. Memleket basshysy sońǵy bes jylda elimizdegi avtokólik sany 1,7 mıllıonǵa artqanyn, jyl saıyn shamamen 3 mıllıon tranzıttik kólik ótetinin aıtyp, kólik kóbeıgen saıyn apat qaýpi de artatynyn eskertti.Resmı derekke súıensek, 2025 jyldyń qańtar-tamyz aıynda elde 22 myńnan asa jol-kólik oqıǵasy tirkelip, sonyń saldarynan 32 myńnan astam adam zardap shekti, 1 446 adam qaza tapty. Jol apatynyń sany 2024 jyldyń sáıkes kezeńimen salystyrǵanda shamamen 7 myńǵa kóp. Keıingi bes jylda tas joldaǵy tragedııadan 12 myńnan asa azamatymyzdan aıyryldyq. Onyń 1 myńnan astamy — balalar, — dedi N. Sársenǵalıev.
Osy oraıda ol júrgizýshi jaýapkershiligi máselesine toqtaldy. Tek 2024 jyly 12,6 mıllıon jol erejesin buzý faktisi tirkelse, 2025 jyldyń 9 aıynda bul kórsetkish 9,7 mıllıonǵa jetken. Mas kúıinde ustalǵan júrgizýshiler sany 16 myńnan asady.
— Sondyqtan jol erejesin birneshe ret óreskel buzǵandardy qaıta emtıhan tapsyrýǵa mindetteý kerek. Ekinshiden, júrgizýshi kýáligin zańsyz berý faktilerin túbegeıli toqtatý kerek. Internette «250 myń teńgege kýálik jasap beremin» degen jarnamalar órip júr. Sońǵy jyldary osyndaı 222 qylmystyq fakt anyqtalǵan. Jaza qatańdamaı, bul másele sheshilmeıdi. Úshinshiden, aıyppuldy kóbeıtip, kamera men drondy tek jazalaý quralyna aınaldyrý durys emes. AQSh pen Eýropa elderindeı drondy jol sapasyn baqylaýǵa paıdalaný kerek. Aqaý anyqtalsa, aqparat avtomatty túrde jaýapty organǵa jiberilýi tıis. Tórtinshiden, apattardyń 30 paıyzy sapasyz joldyń saldarynan. Jelige júginsek, Qazaqstan jol sapasy boıynsha álemde 90-orynda tur. Belgi qoıylmaǵan, syzyq syzylmaǵan, shuńqyry jamalmaǵan joldar apatqa aparady. Sondyqtan jol salý men baqylaýdyń jańa, ashyq tetigi qajet. Merdiger arzan jol emes, qaýipsiz ári uzaq qyzmet etetin trassa salýǵa mindettelýi tıis, — dedi depýtat.
Onyń paıymynsha, birjolaqty trassalar ólim oshaǵyna aınaldy. 2025 jyly adam ólimine ákelgen jol apattary 41,9 paıyzǵa ósti. Atyraý, Aqtóbe, Qyzylorda oblystarynda jaǵdaı aýyr. Avtokólik kóp júretin birjolaqty joldardy keńeıtý — shuǵyl ári mańyzdy mindet.
— Tsıfrlyq navıgatsııa platformalary júrgizýshini qaýipti ýchaske, aýa raıy nemese jol jóndeý týraly naqty ári jedel aqparatpen qamtamasyz etýge mindettelýi kerek. Munymen qosa, kólikke zańsyz ornatylǵan LED jáne Bi-LED shamdarǵa qatań tyıym salý qajet. Qarsy baǵyttaǵy júrgizýshiniń kózine shaǵylysatyn jaryq talaı adamnyń jaryq dúnıemen qoshtasýna sebep bolyp otyr, — dedi Nartaı Sársenǵalıev.
Eske salsaq, jaqynda SQO-da jol-kólik oqıǵasynda tórt adam mert boldy.