Depýtat kóligimen «Qyzylorda-Jezqazǵan» jolyn qalaı júrip ótkenin aıtty
ASTANA. QazAqparat - Parlament Májilisindegi «Nur Otan» fraktsııasy janyndaǵy kóliktik-logıstıkalyq ınfraqurylymdy damytý jónindegi komıssııanyń otyrysynda depýtat Gennadıı Shıpovskıh jeke kóligimen «Qyzylorda-Jezqazǵan» jolymen qalaı júrgenin aıtyp berdi, dep habarlaıdy QazAqparat.
«25 tamyz kúni Qyzylordadan Astanaǵa ózimniń jeke avtokóligimmen jolǵa shyqtym. Osy eki qalanyń araqashyqtyǵy 1 100 shaqyrymdy quraıdy. Sonyń ishinde Qyzylorda qalasynan Jezqazǵanǵa deıin 8 saǵat júrdim. Jalpy, Astanaǵa deıin 15 saǵatta keldim, biraq «Qyzylorda-Jezqazǵan» ýchaskesindegi 420 shaqyrymdy júrip ótýge kóp ýaqyt ketti. 420 shaqyrymnyń 250 shaqyrymy óte apatty jaǵdaıda. Bul jolmen kólikter saǵatyna 40-50 shaqyrym jyldamdyqpen ǵana júre alady. Jol boıynda 4-5 kóliktiń isten shyǵyp qalǵanyna kýá boldym», - dedi depýtat.
Osyǵan baılanysty depýtat «Qyzylorda-Jezqazǵan» jolynyń qurylysyna erekshe mán berý kerektigin alǵa tartady.
«Bul jolmen júretin júrgizýshiler zardap shegip jatyr. Saılaýshylarmen kezdesken kezde, atalǵan joldyń problemasy únemi kóteriledi»,- dedi Gennadıı Shıpovskıh.
Óz kezeginde QR Indýstrııalyq damý mınıstrligi Avtomobıl joldary komıteti tóraǵasynyń orynbasary Amangeldi Bekov búginde «Qyzylorda-Jezqazǵan» jolyn qaıta salý máselesi ózekti ekenin atap ótti.
Kelesi jylǵa atalǵan joldyń qurylysy boıynsha jobalyq-smetalyq qujatnamany ázirleý úshin bıýdjette tıisti qarjy qarastyrylǵan.
Budan buryn habarlanǵandaı, jaqynda QR Investıtsııalar jáne damý mınıstri Jeńis Qasymbek «Qyzylorda-Jezqazǵan» jolynyń qurylysyna iri halyqaralyq qarjy ınstıtýttar qyzyǵýshylyq tanytyp otyrǵanyn aıtqan bolatyn.
