Depýtat QQS-ty kóterýge qatysty: qarjy júgi tutynýshyǵa túsedi

ASTANA. KAZINFORM – Májilis depýtaty Berik Beısenǵalıev qosylǵan qun salyǵy shegin kóterý máselesine qatysty birqatar usynys berdi.

- Bıýdjet daǵdarysy jyldar boıy ósip kele jatqanyn jáne onyń júıeli sebepteri bar ekenin bárimiz bilemiz. Kúrdeli jáne batyl sheshimder qabyldaýdyń ýaqyty keldi degendi jıi estımiz. Meniń oıymsha, kóbi bul oımen kelisedi, biraq biz ne kórip otyrmyz. Úkimet bir mezette qosylǵan qun salyǵyn kóterýdi jáne onyń tóleý shegin azaıtýdy usyndy. Bul rette, qosylǵan qun salyǵy esepke alynbaı, aınalymnan alynatyn salyq bolady jáne barlyq soma túpkilikti tutynýshyǵa qosymsha qarjylyq júkteme bolyp, taýar baǵasyna áser etedi. Sondaı-aq, bıznestiń bólshektenip, kóleńkege ketý qaýpi bar, - dedi Berik Beısenǵalıev Úkimet basshysynyń atyna depýtattyq saýal joldaı otyryp. 

Halyq qalaýlysynyń málimdeýinshe, Úkimet ekonomıkany damytýǵa, shetelden ınvestıtsııa tartyp, bıznesti damytý úshin qolaıly jaǵdaı jasaý qajet. 

Osy oraıda Májilis depýtaty Úkimettiń nazaryna kelesi qadamdardy usynyp otyr.

- Birinshiden, bıýdjettiń shyǵysy men kirisin teńestirip, tıimsiz shyǵyndardy ońtaılandyrý qajet; 
- Ekinshiden, kóleńkeli bıznes sýbektilerin salyq tóleýshiler qataryna birtindep shyǵara otyryp, ekonomıkanyń úshten bir bóligin quraıtyn kóleńkeli ekonomıkany naqty ekonomıkaǵa kóshirý kerek;
- Úshinshiden, ekonomıkanyń naqty sektoryn qoldaý jónindegi tásilderdi qaıta qaraý qajet;
- Memleket naqty jumys oryndaryn beretin, qosylǵan quny joǵary ónimder shyǵaratyn kásiporyndarǵa ǵana qarajat quıýy qajet.

Odan ári Berik Beısenǵalıev Úkimettiń qosylǵan qun salyǵy shegin kóterý jónindegi bastamasyna jeke toqtaldy. 

Birinshi. Úkimet máseleni basqa da tásilder men usynystardy zertteı otyryp, jan-jaqty qaraýy kerek. 

Ekinshi. Qazir talqylanyp jatqan jańa salyq kodeksiniń jobasynda jeńildikter bar, onyń oryndylyǵy el bıýdjetindegi qazirgi syn-qaterdi eskere otyryp qaıta qaralýy tıis.

Úshinshi. Halyqpen jumys isteıtin bıznes sýbektileri úshin bólshek salyq rejıminiń saqtalýyn eskere otyryp, shekti deńgeı qosymsha talqylaý qajet. 

Tórtinshi. Salyqty ákimshilendirý jumysyn jaqsartý, salyqtan jaltarýǵa qarsy kúresti kúsheıtý óte kerek. Munyń bári bıýdjetti tolyqtyrýda mýltıplıkatıvti áser beredi. Bıznesten salyqty kásipkerlerge zııan keltirmeıtin mólsherde alý kerek. 

- Joǵaryda aıtylǵandardy eskere otyryp, Májilistiń salyq stavkalaryn ulǵaıtý jónindegi Úkimettiń bastamalaryn engizý kezinde bizdiń usynystardy eskerýdi suraımyz, - dedi Májilis depýtaty Berik Beısenǵalıev. 

Buǵan deıin Saýda jáne ıntegratsııa vıtse-mınıstri Qaırat Tórebaev Májilistiń otyrysynan keıin qosylǵan qun salyǵy ósse, áleýmettik mańyzy bar taýarlardyń baǵasyna qalaı áser etetinin aıtty.