Depýtat kıiz úıdegi atyshýly bı týraly: Quqyqtyq baǵa berilsin
ASTANA. KAZINFORM – Májilis depýtaty Samat Musabaev qoǵam belsendilerin «LGBT» nasıhatyna qarsy petıtsııa qorytyndysyn talqylaıtyn jıynǵa belsendi qatysýǵa úndedi.
«Babadan qalǵan eń qasterli muramyzdyń biri – kıiz úı edi. San ǵasyr boıy handarymyzǵa eńsesi bıik aq orda, halqymyzǵa qut uıalaǵan baspana bolǵan sol kıiz úıge jáne basqa da qunydylqtarymyzǵa aqparattyq shabýyl da bastaldy. Kúni keshe oıýlaǵan kıiz úıde ulttyq kıim kıip, jartylaı jalańashtanyp oıqastaǵan úsheýdiń áleýmettik jelini sharlaǵan beınerolıgi ısi qazaqtyń ashý-yzasyn týdyryp otyr. Halyqtyń buǵan narazylyǵy ábden oryndy», - dep bastady depýtat.
Samat Musabaevtyń aıtýynsha, atalǵan beınebaıannyń qıyndysy bul búkil ultty, eldi qorlaýmen para-par.
«Eń soraqysy – álgi jyn-oınaqtaǵan úsh uzynnyń ortadaǵy «sıraqty prımasy» ez eken. Bul – halqymyzǵa qarsy mysyq tileýli, teris nıettilerdiń aldyn ala jete oılastyryp, qazaqy dúnıeni, ulttyq qundylyqtardy qunsyzdandyrýǵa, mazaq etýge baǵyttalǵan qasaqana jaýlyq áreketi dep bilemiz. Tal túste tórimizde taırańdaǵany – naǵyz basynǵandyq. Olar búgin tórimizde taırańdasa, erteń tóbemizde oınamasyna kim kepil?! Sondyqtan buǵan kóz jumyp qarap, jaı qaldyra salýǵa bolmaıdy», - dedi depýtat.
Ol sondaı-aq ádette mundaı áreketter qoǵamnyń tamyryn basyp kórý úshin jasalatynyn atap ótti.
«Ekinshiden, LGBT nasıhatyna tosqaýyl qoımaq talapqa degen ashyq qarsylyq, úshinshiden, óskeleń býyndy óz ulttyq qundylyqtarynan jerindirý áreketi. Taıaýda qoǵam belsendileri LGBT nasıhatyna qarsy petıtsııa jarııalaǵan edi. Nebári 2 aptada osy talapty qoldap, 50 myń qol jınaldy. Bul – LGBT-niń elimizge qajetsiz ári jat qubylys ekendiginiń, oǵan halyqtyń ashyq qarsylyǵynyń anyq kórinisi. Alda ótetin petıtsııa qorytyndysyn qaraý otyrysyna qoǵam belsendilerin, ult janashyrlaryn belsene qatysýǵa shaqyramyn», - dedi Májilis ókili.
Sondaı-aq Samat Musabaev Bas Prokýratýra men Ulttyq Qaýipsizdik komıtetinen atalǵan beınerolıkke quqyqtyq baǵa berip, naqty shara qoldanýdy surady.
«Budan bylaı ulttyq qundylyqtarymyz – dombyra, qobyz, kıiz úı, ulttyq kıim, ulttyq taǵam sekildi asyl jádigerlerimizdi teris maqsatta paıdalaný, mazaq etý – ult namysyna qol suǵý, ulttyń bedelin túsirýge baǵyttalǵan qylmystyq áreket dep baǵalanyp, qylmystyq jaýaptylyqpen jazalanýy tıis», - dedi depýtat.
