Depýtat Qytaıda Qazaqstan unyn satatyn ókildik qurýdy usyndy

ASTANA. KAZINFORM — Májilis depýtaty Murat Ergeshbaev Premer-mınıstrdiń orynbasary Serik Jumanǵarınniń atyna depýtattyq saýal joldap, Ózbekstan men Qyrǵyzstannyń Qazaqstan bıdaıynyń eksportyna qandaı tosqaýyl qoıyp otyrǵanyn málim etti.

— Qazaqstan astyq óńdeýshiler odaǵynyń aqparatyna sáıkes astyq óndeıtin 250 kásiporyn bar. Olardyń ishinde naqty jumys istep turǵan kásiporyndar sany búginde 80-nen aspaıdy. Osy 80 kásiporyn qýattylyǵynyń 35-45 paıyzynda ǵana jumys jasap jatyr eken. Bıdaıdy óńdemeı shıkizat retinde syrtqa satý úrdisi damyp keledi. Óıtkeni bıdaıdy syrtqa satý baǵasy ishki naryqqa qaraǵanda joǵary, oǵan qosa eksportqa shyǵatyn bıdaıǵa transporttyq sýbsıdııa bar, — dep bastady depýtat.

Sondaı-aq, ol astyq óndirisinde jyldar boıy sheshilmeı kele jatqan júıeli problemalardy atady.

— Qosymsha qun salyǵynyń jyldar boıy ýaqtyly qaıtarylmaı keledi. «Qaztrade» aktsıonerlik qoǵamy kólik shyǵyndaryn óteý baǵdarlamasyn jetkiliksiz qarjylandyrmaı, kásiporyndar birneshe jyldap ótemaqyny ala almady. Saldarynan elimiz un ónimderin satyp kelgen dástúrli naryqtar — Ózbekstan, Tájikstan, Qyrǵyzstan elderinen aıyrylyp, tek Aýǵanstan qalyp otyr. Kórshilerimiz ımporttyq bajdardyń saralanǵan mólsherlemesin engizdi. Ózderine syrttan kiretin astyqqa baj salyǵy 0% bolsa, unǵa 10% belgilep otyr. Eksporttyq jáne olarǵa teńestirilgen operatsııalarǵa 0% stavka jasap, qosymsha qun salyǵyn 7 kún ishinde jedeldetip qaıtarý sııaqty qadamdar jasap, óz astyq óndirýshilerin qoldap otyr, — dedi Murat Ergeshbaev.

Depýtat Qazaqstanda astyq óńdeýshiler odaǵy astyqtyń ishki naryqta ótýin yntalandyrý úshin kólik shyǵyndaryn óteýdi usynyp otyrǵanyn atap ótti.

— Bul shara nátıjesinde astyq óńdeıtin kásiporyndardy jandandyryp, ónimdi óndeý paıyzy ósip, aýyl sharýashylyǵy taýaryn óndirýshiden bastap un eksporttaýshyǵa deıin naqty qoldaý berer edi. Sonymen qosa, Qytaıda jeke bıznestiń qatysýymen saýda ókildigin quryp, memlekettik eksporttyq korporatsııa jumysyn qaıta qarastyrý arqyly otandyq astyq óndirýshilerge kórshi el naryǵyn ashý qajet, — dedi ol.

Eske salsaq, Qazaqstan bıyl Grýzııaǵa 80 myń tonna bıdaı eksporttaýdy josparlap otyr.