Depýtat Qyryqbaev et eksportyna salynǵan tyıymdy joıýdy surady

ASTANA. KAZINFORM — Májilis depýtaty Temir Qyryqbaev Básekelestikti qorǵaý jáne damytý agenttiginiń tóraǵasy Marat Omarov pen Aýyl sharýashylyǵy mınıstri Aıdarbek Saparovtan et eksportyna salynǵan tyıymdy joıýdy surady. 

— Qazaqstan Respýblıkasynan et ónimderin eksporttaýǵa qoıylǵan tyıymdy tolyq jáne shartsyz joıýdy suraımyn. Budan ári syrtqy saýda máseleleri jónindegi vedomstvoaralyq komıssııanyń otyrystaryna jáne Halyqaralyq ekonomıkalyq uıymdarǵa qatysý úshin ár oblystan bir fermerdi engizýdi usynamyn. Bul aýyl sharýashylyǵy qyzmetkerleriniń naqty suranystaryn eskere otyryp, anaǵurlym úılesimdi sheshim qabyldaýǵa múmkindik beredi, — dedi depýtat.

Ol et eksportyna salynǵan tyıymdy joıý týraly talabyn bylaı túsindirdi.

— Eksportqa tyıym salý — ekonomıkalyq turǵydan negizsiz dep sanaımyn, óıtkeni, bul sheshim bolashaqta elimizdiń syrtqy naryqtarǵa qol jetkizýin shekteıdi jáne aldaǵy ýaqytta iri qara mal baǵasynyń úsh esege ósip ketýine yqpalyn tıgizedi.

Bul jaǵdaıda Úkimet halyq úshin ettiń bólshek baǵasyn tómendetemiz dep jarııalaǵan maqsatyna jete almady. Óıtkeni naryqtyń zańdylyqtaryn kúshpen ózgertý múmkin emes. Eger et óndirý tıimsiz bolsa, onda baǵa, kerisinshe, barlyq tutynýshy úshin qymbattaı túsedi, — deıdi Temir Qyryqbaev.

Sondaı-aq, ol Úkimet buǵan deıin Túrkistan oblysynan et eksporttaýǵa ruqsat berý arqyly ózge et óndirýshilerge ádiletsizdik jasaǵanyn aıtady.

— Mundaı jaǵdaı lobbızm men olıgopolııa belgilerin eske salady. Bul qanshalyqty zańdy? Nelikten dál osy kompanııaǵa eksportqa ruqsat berildi jáne tańdaý qandaı krıterııler boıynsha jasaldy?

Tyıymnyń saldarynan basqa fermerlerdiń tabysy tómendep, satyp alý baǵasy kúrt quldyrap, ınvestıtsııalyq tartymdylyq tómendep, naryq mehanızmderi buzylyp, haos pen belgisizdikti týdyryp otyr, — dedi Májilis depýtaty.

Eske salsaq, Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet otyrysynan keıin ótken baspasóz máslıhatynda jylqy eti áleýmettik mańyzy bar taýarlardyń qataryna enýi múmkin ekenin aıtqan bolatyn.