Depýtat «Kcell» operatory aktsııalarynyń satylýyna alańdaýshylyq bildirdi
ASTANA. QazAqparat - Májilistiń jalpy otyrysynda depýtat Asqar Bazarbaev «Qazaqtelekom» AQ-nyń «Kcell» uıaly operatorynyń aktsııasyn satyp alý ótinishine pikir bildirdi. Osy oraıda ol bul máselege baılanysty QR Ulttyq ekonomıka mınıstri Tımýr Súleımenovtiń atyna depýtattyq saýal joldady, dep habarlaıdy QazAqparat.
«Qazirgi ýaqytta kóptegen ınternet saıttarda «Qazaqtelekom» AQ QR UEM Tabıǵı monopolııalardy retteý, básekelestikti jáne tutynýshylardyń quqyǵyn qorǵaý komıtetine «Kcell» uıaly operatorynyń aktsııasyn satyp alý shartyn kelisý týraly ótinishpen habarlasqany jóninde aqparattar jarııalanyp jatyr. Bul málimetter «Qazaqtelekom» AQ tarapy «Kcell» aktsııalaryn satyp alǵannan keıin, paıdalanýshylar kelisimshartynyń yqtımal sany jalpy naryqtyń 65 paıyzynan asyp, 17 mıllıonǵa jetetinin kórsetedi. Mundaı aýqymdy monopolııa jáne ekonomıkalyq shoǵyrlaný qatardaǵy tutynýshylar úshin tarıfterdi ósirýge alyp kelýi múmkin. «Qazaqtelekom» naryqta óz sharttaryn usyný múmkindigine tolyqtaı ıe bolady», - dep toqtaldy depýtat.
Sonymen qatar mamandardyń pikirinshe, «Qazaqtelekom» AQ-ǵa «Kcell» kompanııasynyń 75 paıyz aktsııasyn satyp alýǵa kelisim berý - memlekettiń monopolııaǵa qarsy retteý boıynsha saıasatyna qaıshy keledi.
«Joǵaryda aıtylǵandar negizinde «Qazaqtelekom» men «Kcell» arasynda jasalatyn kelisimshart boıynsha qoǵamda oryn alǵan rezonansty esepke ala otyryp, quzyretti organnan básekelestikti shekteýge jáne turǵyndarǵa tarıfti joǵarylatý múmkindigine jol bermeý úshin, sondaı-aq el ekonomıkasynda memleket úlesiniń artýyna jol bermeýge qandaı sharalar qarastyrylǵany týraly aqparat berýdi suraımyn», - dedi Asqar Bazarbaev.
Foto: parlam.kz
