Depýtat qazirgi geosaıası jaǵdaıdaǵy el egemendigin nyǵaıtatyn sheshýshi faktorlardy atady
ASTANA. KAZINFORM – Tabıǵatty aıalaý, ekologııamyzdy saqtaý ıdeıasy Konstıtýtsııada qoǵam men memlekettiń ortaq qundylyǵy retinde kórinis tabýy tıis. Bul týraly Astanada Konstıtýtsııalyq reforma jónindegi komıssııanyń alǵashqy otyrysynda Parlament Májilisiniń depýtaty Únzıla Shapaq málim etti.
– Konstıtýtsııanyń preambýlasy - Negizgi Zańnyń jaı ǵana kirispesi emes, ol - onyń ıdeıalyq ári moraldy irgetasy. Preambýla Konstıtýtsııany qabyldaýdaǵy túpki maqsattardy aıqyndaıdy, eldiń tarıhı-mádenı bolmysyn, ulttyq kelbetin tanytady. Sonymen qatar, ol memlekettiń maqsat-mindetterin bekitetin, Ata Zańnyń rýhyn tereń túsinýge jol ashatyn tuǵyr bolýy tıis. Preambýla halqymyzdyń san ǵasyrlyq tarıhı jolyn - kóne dáýirden búginge deıingi taǵdyrly kezeńderdi qamtyp, erkindik, ádildik, teńdik, birlik, jaýapkershilik syndy ultqa tán irgeli qundylyqtarǵa súıenýi qajet. Qoǵamda Konstıtýtsııa preambýlasyn ulttyq qundylyqtarymyzdy aıshyqtaıtyn, ýaqyt ótken saıyn mánin joımaıtyn mazmunda qaıta jazý kerek degen pikir berik ornyqty. Biz - Konstıtýtsııalyq komıssııanyń músheleri bul ustanymdy tolyq qoldap, osy baǵytta júıeli jumys isteýmiz kerek, - dedi Ú.Shapaq.
Osy oraıda ol ózgeristerge qatysty óz pikiri men oıyn aıtty.
– Endigi biz usynatyn preambýla mátininde birneshe irgeli baǵyt aıqyn kórinis tabýy tıis. Preambýlada memlekettiń ýnıtarlyq sıpaty, shekaralardyń myzǵymastyǵy men aýmaqtyq tutastyqty saqtaý máselesine erekshe mán berilýi tıis. Qazirgi geosaıası jaǵdaıda bul qaǵıdattar el egemendigin nyǵaıtatyn sheshýshi faktorlar sanalady. Sondaı-aq «Ádiletti Qazaqstan» ıdeıasy men onyń ózegi sanalatyn «Zań men tártip» qaǵıdatyn preambýla deńgeıinde bekitý - memleket pen qoǵam damýynyń jańa fılosofııasyn aıqyndaıdy, - dedi depýtat.
Onyń paıymynsha, qazir Konstıtýtsııa týraly aıtqanda tek bılik pen quqyqtyq normalardy ǵana emes, ulttyń bolashaq aldyndaǵy jaýapkershiligin de oılaýymyz kerek. Sondyqtan tabıǵatty aıalaý, ekologııamyzdy saqtaý ıdeıasy Konstıtýtsııada qoǵam men memlekettiń ortaq qundylyǵy retinde kórinis tabýy tıis.
– Ádiletti Qazaqstannyń Konstıtýtsııalyq negizi memlekettilik – tek zańdar men ınstıtýttar arqyly ǵana emes, ulttyq rýh pen mádenıet arqyly da ornyǵady. Sondyqtan mádenıettiń jáne rýhanı qundylyqtardyń róli Qazaqstanda aıqyn kórinis tabýy tıis. Dál osy mádenı negiz halyqty birtutas ultqa aınaldyryp, qoǵamdyq birlikti nyǵaıtady. Mádenıetti Konstıtýtsııalyq deńgeıde bekitý arqyly biz Ádiletti Qazaqstannyń tek quqyqtyq emes, órkenıetti memleket ekenin naqtylaımyz. Sonymen birge mádenıet pen ónerge, ǵylym men bilimge, ınnovatsııaǵa, tabıǵatty aıalaýǵa, búgingi jáne keler urpaq aldyndaǵy jaýapkershilikke mán berilýi Konstıtýtsııany tek quqyqtyq emes, órkenıettik qujat deńgeıine kóteredi. Bul – memleket pen halyq arasyndaǵy jarııa qoǵamdyq kelisimniń aıqyn kórinisi, - dedi Únzıla Shapaq.
Budan buryn habarlanǵandaı, Únzıla Shapaq Konstıtýtsııa preambýlasyn jańartý tek redaktsııalyq túzetý emes ekenin aıtqan edi.