Depýtat: Qazaqstannyń kartop eksportyn shekteýi Reseıge paıdaly bolýy múmkin
ASTANA. KAZINFORM — Májilis depýtaty Amanjol Áltaı Premer-mınıstr Oljas Bektenovtiń atyna saýal joldap, kez kelgen ónimniń eksportyn shekteý týraly sheshimdi Májilispen aqyldasyp qabyldaýdy usyndy.
— Fermerler kartopty eksporttaýǵa josparlanǵan shekteýler týraly depýtattarǵa shaǵymdanyp jatyr. Úkimet múshesiniń buqaralyq aqparat quraldaryna bergen málimdemesi birden teris reaktsııaǵa sebep bolýy múmkin. Bizdiń Ózbekstannan kelgen negizgi «satyp alýshylarymyz» mámilelerdi toqtatady, vagondardy jetkizýde problemalar týyndaıdy, Memlekettik kirister komıteti men memlekettik organdar fıtosanıtarııalyq qujattardy berý boıynsha ártúrli syltaýlarmen eksportty tejeıdi. Bıyl 20% ósimmen 2,9 mln tonna kartop ósirildi. Kórshi Reseıde de joǵary ónim alyndy. Eki eldiń negizgi ónim satyp alýshysy — Ózbekstan. Eger biz qazaqstandyq kartoptyń eksportyn jaýyp tastasaq, kimniń utylatyny aıtpasa da túsinikti, — dedi ol.
Depýtattyń paıymdaýynsha, kartop eksportyna tusaý salý fermerlerdiń tabysyn tómendetip qana qoımaı, nesıelerin jabýǵa, jumysshylardyń jalaqysyn tóleýge teris áserin tıgizedi.
— Kartopty eksporttaýǵa tyıym salýdy obektıvti qaraý úshin fermerler men basqa da bıznes sýbektileriniń qoımalarynda kartoptyń bolýyna monıtorıng júrgizý kerek. Qazaqstandyq ónim túrindegi yqtımal keri eksportty eskere otyryp, Reseı Federatsııasynan jáne basqa elderden kartoptyń ákelinýi men tranzıtine taldaý júrgizýdi usynamyz.
Ónimdi eksporttaý kezinde shekteýler engizý jóninde árbir sheshim qabyldaǵanǵa deıin Parlament Májilisiniń salalyq komıtetinde máseleni tyńdaý júrgizilsin, — dedi Amanjol Áltaı.
Depýtat aıtqan Úkimet múshesi — Premer-mınıstrdiń orynbasary — Ulttyq ekonomıka mınıstri Serik Jumanǵarın. Ol BAQ ókilderine ishki naryqty tapshylyq baıqalsa, kartop eksportyna tyıym salynatynyn aıtqan edi.