Depýtat Qazaqstanǵa kólik-logıstıkalyq habtardyń biryńǵaı modelin engizýdi usyndy
ASTANA. KAZINFORM — Parlament Májilisiniń depýtaty, «Amanat» partııasy fraktsııasynyń múshesi Ábýtálip Mútáli Premer-mınıstrdiń birinshi orynbasary Nurlybek Nálibaevqa halyqaralyq tranzıt pen kólik-logıstıka salasyn damytýǵa qatysty depýtattyq saýal joldady.
Depýtat óz saýalynda Memleket basshysy Qasym-Jomart Toqaev Qazaqstandy Eýrazııadaǵy negizgi tranzıttik hab ári tolyqqandy kólik-logıstıkalyq derjavaǵa aınaldyrý mindetin birneshe ret atap ótkenin eske saldy.
Saýalda 2025 jyldyń qorytyndysy boıynsha Qazaqstan arqyly ótetin tranzıt kólemi 36,9 mln tonnaǵa jetkeni aıtylǵan. Sonymen qatar eldiń halyqaralyq tranzıt salasynda áli de zor áleýeti bar ekeni atap ótildi.
Ábýtálip Mútáliniń pikirinshe, Qazaqstan tek tranzıttik dáliz qyzmetimen shektelmeýi tıis. Onyń ornyna óndiris, tsıfrlyq servıster men eksportty biriktiretin qosymsha qun qalyptastyrý modeline kóshý qajet.
Sondaı-aq qazirgi tańda júzege asyrylyp jatqan Smart Cargo, logıstıkalyq pasport, ınfraqurylymnyń tsıfrlyq kóshirmesi jáne qaǵazsyz qujat aınalymy sekildi jobalardyń biryńǵaı ındýstrııalyq-logıstıkalyq ekojúıege biriktirilmegeni aıtyldy.
Halyqaralyq tájirıbege súıene otyryp, depýtat BAÁ-degi Djebel-Alı, Sıngapýrdaǵy Týas jáne Germanııadaǵy Dýısbýrg porttaryn mysalǵa keltirdi. Onyń aıtýynsha, bul ortalyqtar tek tranzıttik dáliz emes, júkti óńdeý, qaptaý, sertıfıkattaý jáne qaıta eksporttaý qyzmetteri damyǵan ındýstrııalyq-logıstıkalyq ekojúıe retinde jumys isteıdi.
Sonymen qatar tsıfrlyq ashyqtyq máselesine de nazar aýdaryldy. Májilismen kásipkerlerdiń júkterdiń qozǵalysyn onlaın baqylaý múmkindigi shekteýli ekenin atap ótti. Osyǵan baılanysty júk kelgenge deıin barlyq salyq, baj, alym jáne logıstıkalyq shyǵyndardy avtomatty túrde esepteıtin aldyn ala tsıfrlyq tólem júıesin engizý usynyldy.
Ábýtálip Mútáli Úkimetke birneshe usynys joldady. Atap aıtqanda:
— erkin ekonomıkalyq aımaqtar, ındýstrııalyq aımaqtar men logıstıkalyq ortalyqtardy biriktiretin arnaıy ındýstrııalyq-logıstıkalyq habtar rejımin engizý;
— Smart Cargo, «bir tereze», logıstıkalyq pasport jáne elektrondyq tasymaldaý qujattaryn qamtıtyn tolyq tsıfrlyq ıntegratsııany qamtamasyz etý;
— barlyq tólemderdiń aldyn ala tsıfrlyq esepteý júıesin engizý;
— erkin ekonomıkalyq aımaqtar men logıstıkalyq nysandarǵa revızııa júrgizip, 2035 jylǵa deıingi ulttyq damý baǵdarlamasyn ázirleý;
— Úkimet janynan biryńǵaı úılestirýshi ortalyq qurý.
Onyń aıtýynsha, bul sharalar Qazaqstanǵa qarapaıym tranzıttik modelden kólik-logıstıka salasynda qosylǵan qun qalyptastyratyn ekonomıkaǵa kóshýge múmkindik beredi.
Buǵan deıin senator Ǵalıasqar Sarybaev óziniń depýtattyq saýalynda qazirgi geosaıası qaýip-qater men tótenshe jaǵdaılar ahýalynda áskerı medıtsınalyq kadrlardy daıarlaý máselesin kóterdi.
