Depýtat qazaqstandyq oıynshylardy «aýla fýtboly juldyzdary» dep baǵalady
ASTANA. QazAqparat - Parlament Májilisiniń jalpy otyrysynda depýtat Magerram Magerramov otandyq fýtbol problemasyn kóterdi, dep habarlaıdy QazAqparat.
«FIFA reıtınginde qazaqstandyq fýtbol 105-inshi orynnan 126-ǵa tómendedi. Іrikteý kezeńderinde ulttyq quramanyń sátsiz oıyndary men álemdik reıtıngte quldyraýy egjeı-tegjeıli talqylaýǵa sebep bola almady. Bizdiń elde fýtbolǵa, fýtbolshylarǵa ári olardyń bapkerlerine barlyq jaǵdaılar jasalǵan. Qazaqstandyq qoǵamda fýtbol klýbtaryna jumsalǵan mıllıondaǵan qarjylyq shyǵyndar men bizdiń fýtbol juldyzdaryna tólenetin shekten tys gonorarlar máselesi birneshe márte talqylanǵan edi. Degenmen de oıyn deńgeıi boıynsha olar «aýla fýtbolynyń juldyzdary» atanýǵa laıyq bolyp tur. Otandyq fýtbolǵa qatysty jaǵdaı alańdatyp otyr. Sondyqtan bul máseleni tez arada qarastyrǵan jón», - dedi Magerramov Mádenıet jáne sport mınıstrligine joldaǵan saýalynda.
Onyń paıymynsha, ulttyq quramany basqarýǵa TMD elderinen bapkerlerdi shaqyrtý tájirıbesin doǵarý qajet. Bul elderdiń ózinde de ishki chempıonattary tómen deńgeıde.
Depýtattyń sózine qaraǵanda, fýtbolshylarǵa shekten tys gonorarlardy qysqartý kerek, sondaı-aq 7 jylǵa komandalar quramyna sheteldik oıynshylardy qosýǵa lımıt engizý qajet.
«Shetel legıonerlerine ruqsat etilgen kólemi aıqyndalýy tıis, ıaǵnı bir klýbqa 4 fýtbolshy eskerilgen jón. Ár oıynǵa negizgi quramǵa eki sheteldik fýtbolshydan artyq emes kólemde oıynshyny qosý shekteýin engizý kerek. Bul qadamdar otandyq jas fýtbolshylardyń kásibı biliktiligin damytýdy yntalandyrar edi, sonymen qatar olardyń klýbtyq komandalardyń negizgi quramynda oınaýǵa ári ulttyq quramanyń namysyn qorǵaýǵa múmkindik berer edi», - dep túıindedi sózin ol.
