Depýtat: Qazaqstanda mektep oqýlyqtary qymbattap jatyr
ASTANA. QazAqparat - Qazaqstanda mektep oqýlyqtary qymbattap jatyr. Bul týraly Májilistiń jalpy otyrysynda Úkimet basshysy Baqytjan Saǵyntaevtyń atyna joldaǵan saýalynda depýtat Irına Smırnova málim etti, dep habarlaıdy QazAqparat.
«2016 jyly oqý, anyqtamalyq, mektep ádebıetteri satyp alýshyǵa shamamen bir danasyna 1 000 teńgeni qurady. Bir jyldyń ishinde osy ádebıetter 20 paıyzǵa, al Oralda 52 paıyzǵa óskeni baıqalýda. Jańa oqý jyly mektep kitaptary men oqý ádebıetteri quny boıynsha rekord ornatýy múmkin»,-dep toqtaldy Smırnova.
Osy oraıda ol 2 synyptyń keıbir oqýlyqtary baǵasyn mysalǵa keltirdi. «Mýzyka» pániniń oqýlyǵy 1 myń teńge, «Nota hrestomatııasy» -2 myń, mýzyka boıynsha jumys dápteri 350 teńge turady. Jalpy osy jıyntyq 3 350 teńgege teń kelip otyr. «Orys tili jáne ádebıeti» -3 900 teńgege, jumys dápteri -1 000 teńgege baǵalanyp, jalpy 4 900 teńgeni qurady. Budan bólek, «Matematıka» - 3 400 teńge, jumys dápteri - 1 000 teńgeni qamtyp, jınaqtyq jalpy quny 4 400 teńgege jetti.
Depýtattyń paıymynsha, baspanyń praıs-paraqshasynda kórsetilgen baǵaǵa qaraǵanda, bólshek baǵa joǵary bolady.
Sóz sońynda ol oqýlyqtardy basyp shyǵarý men baǵany qalyptastyrý úderisin barynsha ashyq ári túsinikti etý qajettigin atap ótti.
