Depýtat Qazaqstanda alımentti qasaqana tólemeýdiń tásilderin atady
NUR-SULTAN. QazAqparat – Parlament Májilisiniń depýtaty Balaım Kesebaeva Qazaqstanda alıment boıynsha bereshek soma 5,5 mlrd teńgeni quraǵanyn aıtty, dep habarlaıdy QazAqparat tilshisi.
«Alıment boıynsha qujattar sany jyl saıyn ósip otyr. 2019 jyldyń 9 aıynyń qorytyndysymen alıment boıynsha bereshek soma 5,5 mlrd teńgeni (2016 jyly – 1,8 mlrd) quraǵan. Bul júzdegen myń balany ata-anasy tıisinshe qamtamasyz etpeı otyr degen sóz. Alıment óndirý qashanda qordalanǵan problemalardyń biri bolyp keledi. Bul problema sheshiminiń árdaıym tabylmaýy - halyqtyń áleýmettik osal toptaryn, ıaǵnı analardy turmystyq qıyndyqtarǵa soqtyratyny bizdi qynjyltady», - dep toqtaldy depýtat Parlament Májilisindegi Úkimet saǵatynda.
Osy oraıda ol alıment óndirý týraly atqarýshylyq qujattardy oryndaýǵa kedergi keltiretin negizgi problemalarǵa toqtaldy. Bul rette sot oryndaýshylary tarapynan atqarýshylyq qujattardyń uzaq ýaqyt boıy oryndalmaýy, alıment óndirip alý jóninde qajetti sharalardyń qabyldanbaý máselesi kóterildi.
«Kóbine jumys berýshiler jalaqyny «qolma qol» jáne «konverttermen» tóleıdi, alıment boıynsha tólemderdi ádeıi boldyrmaıdy, sondaı-aq boryshkerlerdiń jalaqysynyń mólsherin tómendetip kórsetedi, osylaısha kásiporyn basshylary bıýdjetke salyq tóleýden de jaltarady. Sonymen qatar, boryshkerlerdi izdestirý tetiginiń tıimdi nátıjeleri joq. Alıment tólemegeni úshin boryshkerlerdi jaýapqa tartýdyń tıimsizdigi baıqalýda», - dedi B. Kesebaeva.
Budan bólek ol boryshkerdiń turaqty jumys orny men múlki bolmasa, onda jeke sot oryndaýshy odan obektıvti túrde eshteńe óndire almaıtynyn atap ótti.
Depýtattyń paıymynsha, sot oryndaýshylarynyń alımentterdi óndirip alý týraly isterdi ýaqytyly jáne tolyq oryndaýyna baqylaýdy júıeli túrde júrgizý kerek. Jalpy, alıment boıynsha boryshkerlerdi jumysqa ornalastyrý máselesin sheshý qajettigi bar.
«Alıment tóleýden jaltarý bóliginde, jumys berýshiler men boryshkerlerdiń sóz baılasý faktilerin anyqtaý jáne jolyn kesý qajet. Boryshkerlerdi izdestirý, májbúrlep ákelý jáne ustaý tetigin jetildirý de mańyzdy», - dedi B. Kesebaeva.
Onyń aıtýynsha, balanyń qajettiligin jáne onyń jasyn eskere otyryp, alıment mólsherin aıqyndaýdyń tártibin ózgertý, alımenttiń eń tómengi mólsherin belgileý kerek.
«Búginde, alıment mólsheri boryshkerdiń jalaqysynan úles arqyly anyqtalady jáne balalardan góri boryshkerdiń múddesi kóbirek eskeriledi. Al, boryshkerler balalarǵa aıyna 5-6 myń teńge ǵana tóleý arqyly jaýapkershilikten qashýdyń zańdy ádisin burynnan oılap tapqan. Negizinde, alıment mólsherin anyqtaǵan kezde balanyń múddelerine basymdyq berilýi tıis», - dedi depýtat.
