Depýtat Qaırat Qudaıbergendi qamaý merzimi eki aıǵa uzartyldy

ALMATY. QazAqparat - Almaty qalalyq máslıhatynyń depýtaty Qaırat Qudaıbergendi qamaý merzimi eki aıǵa uzartyldy, dep habarlaıdy QazAqparat tilshisi.

Bul týraly Almaty qalalyq sotynyń baspasóz qyzmeti málim etti.

«Sot qaýlysymen tergeý organdarynyń ótinishi qanaǵattandyryldy. Kúdiktige 2 aı merzimine qamaýda ustaý bultartpaý sharasy sanktsııalandy. Qamaý merzimi - 2022 jyldyń 21 maýsymyna deıin»,- dep habarlady Almaty sotynyń baspasóz qyzmeti.

Buǵan deıin Qaırat Qudaıbergenge qatysty áreketti saralaý týraly qaýly shyqqanǵa deıin ony 30 táýlik merzimge kúzetpen ustaý túrindegi bultartpaý sharasyna sanktsııa berilgen edi.

Eske sala keteıik, QR Bas prokýratýrasy Almaty qalasy máslıhatynyń depýtaty Qaırat Qudaıbergenniń qańtar oqıǵasynyń isi boıynsha ustalǵanyn rastady.

Qaırat Qudaıbergen Dıkıı Armanmen birge adam jınaýdy uıymdastyrǵan.

7 qańtarda Almatyda polıtseıler «Dıkıı Arman» laqap atymen tanymal qylmys áleminiń serkesi Arman Jumageldıevti ustady.

Keıin QR Bas prokýratýrasy arnaıy prokýrorlar qyzmetiniń bastyǵy Rızabek Ojarov «Dıkıı Arman» toby 24 beıbit turǵyndy urlap, kúshtep ustaǵanyn aıtty.