Depýtat qant tapshylyǵyn sheshýdiń joldaryn usyndy
«Ulttyq statıstıka bıýrosynyń málimetine súıensek, 2022 jylǵy 7 maýsymdaǵy jaǵdaı boıynsha Qazaqstan Respýblıkasyndaǵy áleýmettik mańyzy bar azyq-túlik taýarlary 19,9 paıyz qymbattaǵan. Onyń ishinde jyl basynan bergi kezeńde qant baǵasy 61 paıyzǵa qymbattap otyr. Búgingi tańda respýblıka boıynsha qantqa qajettilik orta eseppen 550-600 myń tonna bolady. Ózimizde sonyń 10 paıyzy ǵana óndiriledi», - dedi depýtat.
Májilis ókiliniń sózine qaraǵanda, tórt aı buryn bastalǵan qant máselesi halyq arasynda áli dúrbeleń týdyryp otyr.
«Óıtkeni qanttyń baǵasy sharyqtap, 1 kelisi 600-900 teńge aralyǵynda satylyp jatyr. Onyń ústine qantty kez kelgen dúkennen taba almaısyz. Tek belgili bir saýda oryndarynda ǵana satylýda. Osynyń saldarynan qanttan ónim shyǵaratyn shaǵyn otandyq kásiporyndar jybylyp jatyr. Mundaı áleýmettik mańyzy bar azyq-túlik baǵasy budan ári óse berse, el arasynda úlken daý-damaıǵa aınalýy múmkin», - degen qaýip bildirdi ol.
Depýtat atalǵan problemany sheshýdiń birneshe jolyn usyndy.
«Memleket tarapynan beriletin tarıftik jeńildik boıynsha 350 myń tonna qant ákelinedi. Degenmen jeńildik merzimi 4 aıǵa berilip otyr, ol óte az. Óıtkeni álemdegi ekonomıkalyq túrli sanktsııalarǵa baılanysty logıstıka, qarjy operatsııalarynyń kedergileri týyndaýda. Sondyqtan tasymaldaý merzimin 5-6 aıǵa deıin uzartýdy jáne tarıftik jeńildikpen 550-600 myń tonnaǵa deıingi kólemdi qamtý usynylady», - dedi Fahrıddın Qarataev.
Buǵan deıin Eýrazııalyq ekonomıkalyq komıssııa Keńesiniń kezekten tys otyrysynda Qazaqstannyń aq qant pen shıki qanttyń bajsyz ımportyna arnalǵan kvotany 2022 jylǵy 31 qazanǵa deıin uzartý týraly usynysy maquldanǵan edi.
