Depýtat kámeletke tolmaǵandar arasyndaǵy qylmystyń ósý sebepterin aıtty
Osy oraıda senator Qaırat Tastekeev Úkimet basshysynyń orynbasary Altaı Kólginovtiń atyna joldaǵan depýtattyq saýalynda atalǵan máselege toqtaldy.
Depýtattyń aıtýynsha, jastardyń quqyqtyq sanasy men quqyqtyq mádenıetin qalyptastyrý memlekettik saıasattyń basym mindetteriniń biri. Bul rette bilim berý mańyzdy ról atqarady.
Senatordyń paıymynsha, jappaı quqyqtyq tárbıeniń jetkilikti bolmaýy jastar arasyndaǵy qylmyspen tıisti deńgeıde kúresýge múmkindik bermeı otyr.
«Jastar qoǵamnyń belsendi bóligi ekenin eskere otyryp, olardyń saýatyn kóterý jáne zańǵa baǵyttalǵan minez-qulyq úlgisin tárbıeleý jónindegi jumysty kúsheıtý qajet. Jasóspirimder arasynda zańǵa degen oń kózqarasty qalyptastyrý, sondaı-aq bilim berýdiń barlyq deńgeıinde arnaıy oqý josparlary men kýrstary arqyly quqyq júıesiniń ereksheligimen tanystyrý mańyzdy. Quqyqtyq bilim berý protsesinde oqýshy qoǵamda óte mańyzdy qundylyqtardy meńgeretini málim. Sondyqtan oqý oryndarynda arnaıy bilim berýmen qatar, quqyqtyq saýattylyqty da kóterý óte mańyzdy», - dedi Qaırat Tastekeev.
Budan buryn habarlanǵandaı, elimizdegi bala quqyqtary jónindegi ýákil Arýjan Saın Artsport baǵdarlamasy iske qosylǵan kezde jasóspirimder men balalar qylmysy tómendeı bastaǵanyn aıtty.
Onyń sózine qaraǵanda, bul baǵdarlama aıasyndaǵy jumystar birshama tejelip, qarjylandyrý salasyndaǵy máseleler bolǵan kezde, balalar arasynda qylmystar sany qaıtadan ósken.
