Depýtat Q.Sultanov: Zań jobalaryna jasalatyn saraptamalardyń sapasy tómen
ASTANA. 1 aqpan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Qýanysh Sultanov osylaı málim etti.
«Úkimet ázirleıtin zań jobalaryna saraptamalar júrgizýge bıýdjetten qyrýar qarjy bólinýde. Tek ústimizdegi jyldyń bıýdjetinde osy maqsatqa 2 mlrd. 335 mln. teńge qarastyrylǵan. Bul búkil Parlament qyzmetiniń qarjylandyrý kóleminiń 30 paıyzdan astamyn quraıdy», - deıdi Q. Sultanov.
Depýtattyń aıtýynsha, bir saraptama júrgizý quny 1 mln. teńge men 6 mln. teńge aralyǵynda bolyp otyr.
«Saraptamalardy ataqty, belgili, bedeldi zańgerler júrgizgen etip kórsetý de ádetke aınaldy. Saraptamalar aldynda qoıylatyn maqsattar men sarapshylar aldyndaǵy talaptardy eskeretin bolsaq, zań jobalary Parlamentke engizilgende Konstıtýtsııaǵa saı, basqa zańdarǵa qaıshy kelmeıtin, teris áleýmettik jáne ekonomıkalyq saldarǵa ákep soqtyrmaıtyn, sybaılas jemqorlyqqa jol bermeıtin qujat bolýy tıis. Ókinishke qaraı, júrgiziletin saraptamalardyń sapasy tómen ekenine zań jobalaryn qaraǵan kezde kóz jetkizip júrmiz», - deıdi depýtat.
Q. Sultanov zań jobalaryna jumsalyp jatqan qarajat ıgeriminiń tıimdiligin tekserý qajettigin alǵa tartty.
