Depýtat ınjenerlik jeli tartýǵa bólingen 24 mlrd teńgeni joq qylǵan 8 oblysty atady

ASTANA. QazAqparat – Májilis depýtaty Baqytbek Bazarbek ınjenerlik jeli tartýǵa bólingen qarajat joǵalǵan 8 oblysty atady, dep habarlaıdy QazAqparat tilshisi.

«Bıýdjet qarajaty tıimsiz jumsalatyndyqtan túrli másele týyndaıdy. Keshe Bas prokýratýraǵa ınjenerlik jeli tartýǵa arnalǵan 24 mlrd teńgeniń joǵalýyna baılanysty 8 oblys ákimdigi boıynsha aryz jiberdim. Bul aqsha qaıda? Al adamdar jer ýchaskesin kútip otyr», - dedi depýtat Parlamenttiń birlesken otyrysynan keıin BAQ ókilderiniń saýalyna oraı.

Onyń dereginshe, atalǵan qarajat Mańǵystaý, Atyraý, Batys Qazaqstan, Túrkistan, Qostanaı, Aqmola, Jetisý jáne Jambyl oblystarynda joǵalǵan.

«2021 jyly 8 oblysqa 51 mlrd teńge, bireýine 5 mlrd, endi birine 8 mlrd teńge bólingen. Onyń 48 mlrd teńgesi ıgerilgen. Osy 48 mlrd teńgeniń 24 mlrd teńgesine jumystar oryndalǵan. Al 24 mlrd teńgege eshkim esep bermegen. Al ınjenerlik jeliler qaıda? Munyń ústine 2023 jylǵa 61 mlrd, 2024 jylǵa 54 mlrd teńge bólinedi. 2021 jyly bólingen qarajatqa ne bolǵanyn bilmeı turyp qalaı aqsha bólemiz? Bul respýblıkalyq bıýdjettiń qarajaty ǵoı. Shynyn aıtqanda, muny Antkor da bilmeıdi. Keshe aryzymdy Bas prokýratýraǵa tabystadym. Olar Antkorǵa beredi dep úmittenemin», - dedi Baqytbek Bazarbek.