Depýtat halyqty tutynýshylyq qaryzǵa ıtermelep otyrǵan saýda ortalyqtaryna shúılikti
ASTANA. 22 qańtar. QazAqparat - Búgin Parlament Májilisiniń jalpy otyrysynda Úkimet basshysy men Ulttyq Bank tóraǵasynyń atyna saýal joldaǵan depýtat Nıkolaı Kýzmın halyqtyń ekinshi deńgeıli bankterge tutynýshylyq qaryzynyń kúrt ósýine alańdaýshylyq bildirdi.
Depýtattyń sózine qaraǵanda, halyqtyń tutynýshylyq qaryzy 2013 jylǵy 1 jeltoqsandaǵy jaǵdaı boıynsha 2,2 trıllıon teńgeni qurady. Sonyń ishinde kúntizbelik jylmen salystyryp qaraǵanda, 2012 jyl men 2013 jyldyń qarasha aılary arasynda tutynýshylyq qaryz 48 paıyzǵa ósip, 701 mlrd. teńgeni qurady.
«Bir jaǵynan, ekinshi deńgeıdegi bankterdiń, halyqtyń tóleý qabilettiligin ulǵaıta otyryp, taýarlardyń tutynýshylyq naryǵyn belsendi nesıelendirýi qýantady. Áıtse de máseleniń ekinshi jaǵy bar: bankterdegi tutynýshylyq nesıege bizdiń taýar óndirýshiler men iri saýda ortalyqtarynyń ıeleri óz taýarlaryn ótkizý maqsatynda kúshtep ıtermelep otyr. Biz batys Eýropa jáne basqa elderdiń tájirıbesinde memlekettiń qaryzǵa ómir súrýiniń qaýipti ekendigin kórdik emes pe?» - deıdi depýtat N. Kýzmın.
Onyń aıtýynsha, elimizde 90 kúnnen artyq qaryzyn tóleı almaǵan jeke tulǵalar sanynyń turaqty ósý úrdisi baıqalady. Bul ekinshi deńgeıdegi bankterden alynǵan nesıelerin qaıtarýǵa múmkindigi joq halyq sanynyń kóbeıgenin kórsetip otyr. «Máselen, 2013 jyldyń 11 aıynda ǵana 90 kúnnen artyq nesıesin tóleı almaǵan jeke tulǵalar qaryzy 15,3 paıyzǵa ósken. Osy úrdistiń ári qaraı jalǵasatyndyǵyna kúmán joq. Bul, óz retinde, halyq arasynda keri áleýmettik saldarlarǵa ákelip soǵýy da múmkin», - deıdi depýtat.
